Luz Pozo, unha «ilustre» das Letras Galegas


Teño 95 anos e sigo escribindo; de momento a cabeza vai respondendo e eu creo na inspiración». Son palabras de Luz Pozo Garza que reflicten a súa enerxía, a súa disposición e, sobretodo, afortunadamente, a súa saúde.

Luz Pozo (Ribadeo, 1922) é, a estas alturas, unha «ilustre» das Letras galegas, sen dúbida. Estudou Maxisterio, Filoloxía Románica e tamén Música e nótaselle na súa escrita; principalmente nos seus versos. Poeta refinada, culta, cálida; sensual ás veces, profunda outras. Académica da Lingua desde 1996, é xa un referente en especial para as escritoras galegas, aínda novas, como tamén o era Novoneyra -o poeta-pai- para moitos de nós.

Agora en Viveiro están a sumar apoios para que o concello nomee a Luz Pozo Filla Adoptiva. De facelo, é o momento; méritos sóbranlle. Premio da Crítica, Medalla Castelao, membro -como dixen- da Real Academia Galega. Viveiro é moi importante na súa vida; aquí ten raíces principais, fondas. Aquí retornou despois do exilio coa familia (aos 14 anos por mor da Guerra Civil a súa familia deixou Viveiro e trasladouse a Lugo en primeiro lugar e despois a Larache, en Marrocos). Cando hai apenas unhas semanas decidiron poñerlle o seu nome á Escola Oficial de Idiomas, levou unha alegría; supuxo para ela unha satisfacción no máis íntimo; confesouno nestas mesmas páxinas da Voz; a esta idade súa na que a sensibilidade está na superficie aberta da pel, este detalle emocionouna.

Seguro que, a pouco que se pense, hai algúns outros persoeiros destacados merecentes do mesmo honor; nesa relación figura tamén ela, poeta grande. O ano pasado a RAG dedicoulle unha emotiva homenaxe no seu 95 aniversario. «A poeta do amor», así a definiu Alonso Montero nese acto; autora de dezaséis libros de poesía, Luz Pozo deu peso, fondura e calidade á poesía galega no difícil tempo da posguerra.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Luz Pozo, unha «ilustre» das Letras Galegas