«Aos 'vesperos' gústanos disfrutar da vida, dos amigos e da gastronomía sen correr»

O club mariñán agrupa a uns 30 afeccionados ás motos e coches clásicos de Galicia e Asturias


viveiro / la voz

Hai tres anos que Fran Rivas Dasilva, a quen todo o mundo coñece como Pitero, xuntou a «catro ou cinco amigos» de Lourenzá aos que tamén lles gustaban os vehículos clásicos, pero sobre todo as Vespas. «Entre todos xuntamos once ou doce motos e coches, e aí empezamos», recorda o presidente de VespaFaba e Clásicos Lourenzá, un club que hoxe en día agrupa a unha trintena de afeccionados de poboacións tan dispares como Lourenzá, As Pontes, A Coruña e mesmo de Asturias, como detalla este laurentino de 42 anos que posúe máis de 15 motos e ata unha carroceta de 1930. «A maioría da xente que ten Vespa ten coches clásicos, e tamén hai xente que agora non ten, pero polo simple feito de que che gusten xa podes ser amigo de VespaFaba», convida.

-O domingo pasado xeneraron bastante expectación nas Quendas de Mondoñedo, a donde levaron unhas 20 vespas e lambrettas...

-Nesta ocasión invitounos a Asociación As San Lucas, pero movémonos moito durante o ano. Case todas as fins de semana imos a algún sitio. A fin de semana anterior estivéramos en Bretoña, e esta iremos ao rali de clásicos de Viveiro. O 20 de maio temos unha concentración en Ourense á que levaremos oito ou 9 coches. Tamén imos a Nigrán, facemos tres ou catro fechas en Asturias... No 2017 estivemos na presentación do Vespa Club de España en Madrid...

-Parece que non paran...

-É verdade porque te chaman de moitos sitios e colaboras levando os coches ou as motos, en conferencias, feiras de recambios...

-Ademáis de acudir a concentracións e exhibicións que se organizan noutros puntos da xeografía galega e española, ¿organizan algunha cita como club en Lourenzá?

-Temos dous eventos anuais. En Semana Santa organizamos a reunión de amigos de VespaFaba e Clásicos. E durante a Festa da Faba facemos unha concentración na que no ano pasado pasamos de cen vehículos.

-¿Xoga algún papel a velocidade na súa afección?

-Un «vespero» non é un motero. Aos ‘vesperos’ gústanos disfrutar da vida, dos amigos, da paisaxe e da gastronomía sen correr. A Vespa é para pasear, nela non miras o tempo, aínda que podes dar a volta ao mundo nela. A marcha máis longa que fixemos foi a de La Travespera, en Cangas de Onís. Foron 230 quilómetros rodando todo o día e bordeando os Picos de Europa.

-¿Segue sendo o motor un mundo de homes?

-Cada vez menos. En VespaFaba tamén hai mulleres «vesperas». Temos un grupo en Facebook (https://www.facebook.com/VespaFaba-Cl%C3%A1sicos-Lourenza-LU-572104593138306/) e tamén estamos en Instagram para colgar o que facemos.

-¿Teñen algún vehículo singular?

-Hai uns cantos, como os míticos 600 ou o Escarabajo, pero no club temos un coche que rompe os esquemas todos porque no seu día foi un coche funerario. Témolo para chamar a atención, para dar imaxe e rizar o rizo e o certo é que o conseguimos. É un Peugeot 505 2.2. GTI automático de 1989, coa matrícula LU-K, e de gasolina. A xente alucina con el. Chamámoslle «a ranchera». O sábado fixo 47.700 quilómetros, está noviño. Hai xente á que lle dá «yuyu», e por iso sacóuselle o crucifixo, puxémoslle unha moqueta pola parte de atrais e enchémolo de globos para regalarllelos aos nenos nos sitios onde o levamos.

«Teño andando 3 Vespas e 1 Lambretta, e pendendes de preparar dúas que teñen sidecar»

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

«Aos 'vesperos' gústanos disfrutar da vida, dos amigos e da gastronomía sen correr»