«Intentamos ser mellores pescadores aprendendo uns dos outros»

Xa hai máis de 170 inscritos de diferentes rexións nas xornadas de pesca de Foz


FOZ / LA VOZ

Charlas, probas prácticas, saídas de pesca... Dun amplo programa de actividades disfrutarán os máis de 170 comensais e 72 pescadores xa inscritos nas segundas Xornadas de Pesca con Señuelos que se celebrarán en Foz os vindeiros días 14 e 15. Tralo éxito o ano pasado da primeira edición, a vila mariñana converterase novamente nun lugar de referencia a nivel nacional do deporte náutico. Alberto Burundarena é o presidente da asociación A Ribeira, que organiza esta actividade na que todos os actos son gratuitos e abertos ao público, excepto as comidas, que si precisan de inscripción previa. Destaca a axuda de Michel, xerente da tenda Kukadas-Foz e o apoio do Concello, da ACIA-CCA e da Deputación, ademais do asesoramento dos ponentes e colaboradores do equipo de pescadores Fiiish de España e de El Pez Rosa.

-¿De onde proceden os participantes?

-De toda A Mariña, de Santiago, A Coruña, O Barco de Valdeorras, moitos de Asturias, de Cantabria...

-¿En que radica o éxito das xornadas para espertar o interese de participantes de tantas rexións?

-Publicítase co boca a boca, polas redes... Os técnicos que veñen impartir as ponencias son profesonais moi coñecidos a nivel nacional e internacional. Tres deles estiveron recentemente aprendendo cousas novas en Xapón, cuna da pesca do calamar.

-¿Está de moda a pesca deportiva?

-A pesca deportiva ten moito tirón e a nosa costa é un lugar ideal para practicala. É tranquila. Xa lle chamaban os vellos o mar de Deus. Gozamos de boas condicións, mellores que outras zonas de Galicia. Ademais, deste tipo de eventos fanse poucos, moi contados pola nosa zona.

-A celebración destas xornadas dálle proxección a un pobo coma Foz...

-É un plus engadido a outras moitas cousas. Foz ten un gran potencial en materia de pesca deportiva, que se pode practicar todo o ano. Ademais, este tipo de iniciativas de formación non son habituais.

-¿Cal é o principal obxectivo desta actividade?

-Aquí non se vai vender nada, non é unha exposición. O obxectivo é coñecerse, para estar en contacto. Non é un evento para pescar, é un evento para coñecer a outros pescadores. Intentamos ser mellores pescadores aprendendo uns dos outros.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
4 votos
Comentarios

«Intentamos ser mellores pescadores aprendendo uns dos outros»