«Abrimos a billa e parece que nunca se vai acabar a auga... pero acábase»

Unha mostra de aforro no fogar abre en Burela co lema «vivir mellor con menos»

.

burela / la voz

Hai un dito aplicable a diversos sectores da vida e moi repetido nos últimos tempos: menos é máis. O mesmo se podería dicir do medioambiente, no sentido en que se aforramos todos, aportando cada un o seu grao de area dende a súa casa, a terra gañará en calidade de vida. É a nosa gran casa, ao fin e ao cabo. A que o fogar, ademáis de doce sexa sostible, contribúe unha didáctica exposición recén aberta na Casa da Cultura de Burela da man da delegación municipal de Medio Ambiente que leva Noelia Ben e o Centro Nacional de Educación Ambiental: «Esta exposición xorde no ámbito do Programa Educativo Fogares Verdes do Ceneam, que comezou a súa andaina en 2006 como unha iniciativa piloto dirixida a familias preocupadas polo impacto ambiental e social das súas decisións e hábitos cotiáns».

-Cal é o obxectivo da mesma?

-Acompañar ás familias no proceso de cambio cara a unha xestión máis responsable do seu fogar, promovendo o autocontrol do consumo doméstico de agua e enerxía introducindo medidas e comportamentos aforradores axudando a facer unha compra máis ética e máis ecolóxica.

-Saberemos, chegado o momento, vivir mellor con menos? Porque a realidade parece que vai polo lado contrario. Exemplo, seguimos malgastando auga e iso que hai xa alerta por sequía.

-Si, o da sequía é un problema gordo. En A Mariña tamén hai alerta. Agora mesmo, a sociedade é bastante consumista. Con todo. Abrimos a billa e parécenos que nunca se vai acabar a auga. Pero acábase. A poboación é a primeira que ten que resolver, xa non digo os políticos que tamén teñen que facer o seu traballo.

-Somos nós, logo, a primeira liña de defensa...

-Primeiro temos que coidar o que temos, pero tamén dende arriba non se está a facer nada.

-Estamos a chegar algo tarde?

-Creo que si. Vexo algunhas urbanizacións que se fixeron e se non había auga para tantas vivendas, como é que se fixeron igual?. O urbanismo foi medrando pero tes que saber os recursos cos que contas. A veces cárgase todo aos concellos pero estos tampouco teñen os mecanismos.

-Nós, no día a día, que podemos facer para contribuír a un mundo máis sostible?

-O típico. Hai filtros para poñer na billa que reducen o consumo de auga, ao tirar da cisterna dárlle ao pulsador de media carga, intentar xenerar menos residuos porque canto máis levamos para Sogama, máis hai que transformar e máis emisións se botan, aproveitar mellor os alimentos que nos quedan... Cando se me estropeu a campana da cociña fun mercar unha e vin unha coa etiqueta «eco» e dixéronme que consume menos pero miro as especificacións e resulta que consumía máis que unha normal. Hai que mirar con lupa, todo! Tamén na casa se poden cambiar as bombillas tradicionais por leds e ata se nota na factura, que é importante, cerrar a billa mentras nos enxabonamos na ducha ou mentras lavamos os dentes, esperar a cargar de todo a lavadora e o lavavaixelas, facer como facían as nosas avoas a cociña de aproveitamento, etcétera. Aquí en Burela tamén repartimos composteiros e houbo moita xente interesada, sobre todo de casas con fincas ou cunha terraza.

-Como ve os máis pequenos en materia medioambiental? Aforran tamén na casa?

-Os pequenos están máis concienciados. Facemos todo o ano actividades nos coles. O meu ten sete anos e máis concienciado non pode estar. Na nosa casa ímolo facendo bastante ben. Eles están aprendendo xa dende pequenos, non é coma nós que temos o vicio feito e é máis difícil de correxir.

-É, entón, unha cuestión de educación ecolóxica, verdade?

-Si. De feito, nos colexios sempre nos din que non queren sacar a programación medioambiental. Somos o único concello da Mariña cun centro de educación ambiental, Gaia, no que temos dúas monitoras. Leva dez ou once anos xa funcionando.

-A quen recomenda visitar a exposición burelense?

-Se eres unha persoa á que lle gusta non malgastar enerxía e queres ser máis sostible.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

«Abrimos a billa e parece que nunca se vai acabar a auga... pero acábase»