«Na provincia de Mondoñedo existían viñedos»

Vinteséis inscritos no curso sobre patrimonio cultural que comeza hoxe na cidade mindoniense organizado pola USC


Gonzalo Francisco Fernández Suárez dirixe, xunto coa profesora Ana Goy Diz, o curso da USC titulado O Futuro do patrimonio cultural: o caso da cidade de Mondoñedo, que comeza hoxe na localidade, con 26 inscritos.

-Un curso sobre Mondoñedo en Mondoñedo.

-O feito de celebrarse en Mondoñedo obedece a un convenio de colaboración que desde o Centro de Estudos de Historia da cidade vimos desenrolando co Concello de Mondoñedo; unha das múltiples cuestións que aparecen nese convenio era celebrar algún seminario, algún foro de debate en Mondoñedo. Logo, o caso de centrarse en Mondoñedo é que Mondoñedo reúne dende o noso punto de vistas as premisas que aparecen contempladas no programa. É unha cidade que ten un importante patrimonio arquitectónico e artístico; o feito de ser unha das antigas provincias do Reino, de ter unha organización que puidemos rastrexar na Idade Media e o feito de ser unha das sedes episcopais galegas. Todo iso fai que reúna un importante patrimonio histórico, artístico e tamén documental, como aparece nun dos bloques do programa do curso.

-Abordan temas variados.

-Sí, sí. O que é o patrimonio cultural é un concepto moi amplo. Por patrimonio podemos contemplar dende unha igrexa. unha catedral, un palacio; podemos considerar patrimonio as pezas custodiadas nun museo. Pero despois hai outro patrimonio que é menos visible, pero que é igual de importante, como é o caso do que vai no bloque terceiro dedicado ó patrimonio documental. No caso de Mondoñedo, ten un patrimonio documental destacable. Por un lado, a documentación xerada polo Concello dende o séculos pasados, no curso das súas actividades; está tamén o patrimonio documental conservado na catedral de Mondoñedo, no propio arquivo diocesano e incluso noutros arquivos, como pode ser o arquivo histórico provincial de Lugo no que se conservan documentos expedidos ante notario, os chamados documentos da fe pública. Tamén os documentos conservados noutros arquivos fóra de Galicia; pensemos nos que se conservan no Arquivo Histórico Nacional ou os eferentes a Mondoñedo que se conservan no Arquivo Xeral de Simancas ou a Chancelería de Valladolid.

-No programa aparecen apartados dedicados ó viño, a pratería... ¿Xa se tiñan tratado estes temas?

-Non se tratou en moitas ocasións, hai elementos do patrimonio mindoniense que nos son descoñecidos, Por exemplo, a doutora Diana Duo Rámila vai poñer de manifesto a rica pratería existente en Mondoñedo ou aspectos que hoxendía non nos son visibles en Mondoñedo, pero que noutras épocas, por exemplo entre os séculos XVI e XVIII constituía un aspecto importante da vida económica mindoniense, como era o comercio do viño. Mondoñedo igual que outras poboacións galegas tiña unha peza fundamental nas ordenanzas municipais que era regular o prezo do viño dependendo da súa procedencia. E non hai que esquecerse de que ata os séculos XIV-XV na área da provincia de Mondoñedo existía o cultivo do viño, existían viñedos. É un aspecto moi relevante que a persoa que vai intervir, Carlos Andrés González Paz, investigador do Instituto de Estudos Galegos Padre Sarmiento, coñece de primeira man porque a súa tese de doutoramento xirou entorno á sede mindoniense e aí o tema do viño é un aspecto recorrente na información que temos

-¿Como está de conservado o patrimonio?

-Xa dende fai anos e actualmente se está facendo un esforzo considerable por poñelo en valor e tratar de dalo a coñecer. Pero en Mondoñedo como en outras poboacións, é unha asignatura pendente, ou mellor dito, que se está botando a andar agora. E ten unhas posibilidades inmensas dende o punto de vista da posta en valor e difusión do seu patrimonio (...), tanto no casco como nas parroquias.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

«Na provincia de Mondoñedo existían viñedos»