«A día de hoxe só queda este barco boniteiro de madeira en Galicia»

Dende 1998 é posible visitar en Burela esta embarcación-museo sobre a pesca

.
m.c.
burela / la voz

Lino Pernas (Covas, 1964) leva vivindo case 30 anos en Burela, onde sempre traballou en profesións relacionadas co porto. Agora leva ano e medio sendo o guía do barco museo «Reina del Carmen» de Burela. O seu pai e o seu avó paterno foron mariñeiros, polo que a auga salgada estivo sempre presente na súa vida. Non lle foi complicado familiarizarse coa información que dá aos moitos visitantes que se achegan a este museo nas ondas... Mais a súa labor vai máis aló. É tamén o encargado do mantemento diario deste barco. «Hai que ter paciencia, pero gústame moito o meu traballo», explica. Porque coma o movemento do mar, aquí as visitas fanse paseniño e con toda a precaución que hai que ter cando se navega.

-Que importancia ten o barco museo nun lugar como Burela?

-Abriu no ano 1998 coa intención de transmitir ás novas xeracións cómo era un barco boniteiro de madeira. A día de hoxe só queda este barco boniteiro de madeira en Galicia, e é tamén toda unha homenaxe á xente do mar. Burela substentou durante moito tempo a súa economía na pesca e é unha maneira de coñecer máis sobre esta tradición. Conta tamén coa bandeira azul de museos, o que é un recoñecemento moi importante.

-As visitas son sempre guiadas?

-Si, eu estou de maneira permanente facendo o percorrido. Ademais, gústame moito. Hai que ter paciencia, pero gústame moito o meu traballo, e ver como á xente lle agrada aprender máis.

-De onde vén xeralmente a xente que se achega?

-De todos os puntos de España. No inverno recibo moitos colexios, de maneira gratuíta, tanto de pobos de cerca como dalgún sitio máis lonxe. Hai tamén turistas que veñen a propósito a visitar este barco museo porque o ven na prensa ou na televisión.

-Que é o que máis lle sorprende aos visitantes?

-Os nenos quedan mirando para os detalles, como o tema dos baños, que no caso deste barco son baños turcos, como se empregaban nos anos cincuenta e sesenta polos mariñeiros. A neveira está reformada para acoller unha exposición de artes de pesca, e é tamén unha explicación que chama moito a atención, xa que non só falo do bonito, senón de máis tipos de pesca. Nunca me coincidiu que saíse alguén descontento da visita. Tamén gusta moito a ponte porque é onde están todas as máquinas e é onde tamén se dá unha explicación detallada.

-Cal é o horario de visitas?

-No verán hai visitas guiadas de martes a domingo, ás 11.00 horas, ás 12.00, ás 13.00, ás 17.00, ás 18.00. A última faise ás 19.00 horas.

Votación
1 votos
Comentarios

«A día de hoxe só queda este barco boniteiro de madeira en Galicia»