«Teño 22 vacas e cada unha con nome»

Organizan un ano máis a feira de gando tradicional do día de san Bartolo en Xove


xove / la voz

María Jesús Cuadrado Casariego é muller de campo. E dende hai algo máis dun ano a presidenta da Comunidade de Veciños Costa de Laxamoura, formando parte dunha directiva que completan outras tres mulleres máis. Elas son Benedicta Otero, Lorena Pérez e Isabel Fra. A feira de gando que este xoves se celebrará en Penasagudas (San Isidoro de Monte-Xove) é das clásicas na Mariña. E neste caso, de novo con organización 100% feminina.

-Queda pouco para o día 24.

-Agora estamos a preparar os curros para que todo saia ben e veña a xente de fóra co gando.

-Que quede todo ben vaiado non vaia ser que escape un touro...

-Por iso! Non queremos que nos pase! O ano pasado todo saíu ben.

-Colleulle o gusto a presidir a comunidade veciñal... ou non quedou máis remedio?

-A ver, contra gusto tampouco estamos. Na comunidade temos que seguir tres anos máis, a ver que pasa cando toque o relevo. Agora estamos máis relaxadas na directiva, temos un enxeñeiro de montes de asesor. E tamén, e isto hai que dicilo, temos uns maridos que nos axudan moito.

-Cre que hai suficientes mulleres no sector gandeiro en xeneral?

-Na miña parroquia... home, non é que haxa moitas. No sector gandeiro as mulleres métense pouco porque non compensa meterte a gandeira tal e como están as cousas. Si, isto falo por amor á arte, porque gusta. E na miña casa levamos moito tempo. Estiveron meus pais, meus sogros...

-Case é difícil atopar no sector alguén que non nacera dentro del.

-Tamén hai xente que non nacera e que lle guste, pero polo xeneral si, é xente que temos gando na casa, polo menos aquí en Penasagudas. Agora somos 40 comuneiros. Foi morrendo xente, outra foise ou se retirou e quedou a explotación abandonada.

-Algo que non lle deixe durmir aparte de enfermar unha vaca?

-A Administración tiña que apoiar máis ao sector gandeiro. Din que nos apoian pero non se ve tanto apoio como din. Realmente, imos tirando.

-Cantas vacas ten a explotación?

-Vacas de carne, sobre 22. E tamén 7 ou 8 bestas.

-Distingue a cada unha das 22?

-Si, e cada unha con nome: Valentina, Pelota, Diana... As miñas vacas coñézoas todas. Os animais son moi listos e a veces máis agradecidos que as persoas. Tiven unha becerriña que a criei tres meses ao biberón, coma un pícaro, porque lle morrera a nai. Ao ser criada así vendímola porque non quería máis que estar xunto min e para estar no monte, non se defende igual. Era Valeria.

-Cantas reses calculan que poderá haber na feira de gando?

-Sobre 600 ou 800. Esperemos... Tamén esperamos ter bo día. É o día do santo ademais, san Bartolo, tanto en Xove como en Penasagudas. Pero festivo local non é; hai anos era. Ese día veñen gandeiros de fóra e da parroquia.

-Soen ser boas as vendas?

-Depende de como veña a xente para vender. O ano pasado tamén tivemos ovellas á venda e cochos, era a primeira vez que había.

-En Penasagudas falla a cobertura de móbil. Como se leva iso?

-A dicir verdade... así vívese moito máis relaxado na aldea ¡e vendo como están os tempos!

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Comentarios

«Teño 22 vacas e cada unha con nome»