«Non penso retirarme sen devolver ao Pescados Rubén-Burela a Primeira»

O naronés préstase a continuar no club tras o descenso se así o quere a directiva


BURELA / LA VOZ

Tras case unha década defendendo ao Pescados Rubén-Burela, os ánimos do capitán Edu (Narón, 1979) non decaen polo empate ante o Levante (4-4) que custou o descenso. En contra da rumoroloxía, o porteiro non pensa na retirada, e ofrécese a intentar devolver ao club a Primeira se a directiva conta con el.

-Deulle tempo a reflexionar sobre todo o ocorrido?

-Son momentos duros, que hai que ir asimilando pouco a pouco. Hai moi pouco tempo aínda que descendimos e está claro que aínda doe, moito.

-Vostede xa vivira esta experiencia no Celta. Axuda iso a levalo con máis enteireza?

-Creo que non. Ao final son situacións totalmente diferentes. En Vigo estiven pouco tempo, e aquí levo moitos anos. As sensacións son diferentes porque eu síntome implicado aquí, no pobo, síntome querido... E tamén doido polo que pasou.

-Antes de comezar a campaña, case todo o mundo daba ao equipo por consolidado en Primeira. Tamén o vestiario?

-Eu creo que ninguén pensaba que puidésemos chegar a isto. O equipo era case idéntico ao do ano pasado, cando fixemos unha gran tempada, e agora por que non íamos poder repetir? Pero houbo moitas circunstancias que influiron na nosa traxectoria. Todas aquelas derrotas consecutivas que nos fixeron meternos abaixo xeraron presión, e así é moito máis complicado xogar partidos.

-Tamén os perseguiron as lesións, a súa por exemplo.

-Cando fas un ano así, non valen as excusas. Houbo lesións que inflluiron no rendemento do equipo, pero o que pasou é culpa nosa. Houbo moitos partidos que o ano pasado sacábamos adiante e agora non fomos capaces. As lesións perxudicáronnos, está claro, pero non podemos esconder que non estivemos á altura.

-Aínda así, tiveron a permanencia na man grazas ao favor de Santiago.

-Tíñamos moi claro que o principal e primordial era sacar adiante o noso partido, e despoius xa veríamos os resultados dos demais. E non o conseguimos. O partido, na primeira parte, puxósenos de cara, pero despois non estivemos ben defensivamente, e na segunda metade puxémolo todo na pista, pero pesounos a falta de gol que arrastramos todo o ano.

-Un acórdase agora dos puntos de Jumilla, por exemplo.

-Non só foi aquel día, pénsalo e foi a tempada enteira. E ao final se o venres gañásemos estaríamos salvados. Ao final isto non é consecuencia dun ou outro partido, senón dunha mala tempada.

-Que mensaxe lle pode mandar agora á afección?

-O único que poido facer é darlles as grazas polo apoio dos últimos partidos e dicirlles que este club é moi grande e volverá estar arriba porque A Mariña merece un equipo en Primeira División, e todos imos poñer o máximo para devolver ao Burela a onde se merece.

-Tócalles cambiar o chip e pensar na final da Copa Xunta, ante Santiago. Está o vestiario capacitado para afrontalo despois deste pau?

-O pau foi criminal, pero houbo tempo para que a cabeza se fose recuperando, e hai que pensar en gañar a Copa Xunta porque este club merece tela por fin nas súas vitrinas.

-Moitos se preguntan se este será o último partido de Edu.

-Eu teño ganas de seguir xogando ao fútbol sala e teño ganas de seguir en Burela para devolver ao club a Primeira División. Se o club quere que siga, eu estarei aquí a morte. Non penso retirarme sen devolver o Burela a Primeira.

-O de quedarse para arranxar isto é o pensamento xeral do vestiario?

-Está claro que nós somos os culpables, e eu persoalmente si quero quedarme para volver a subir, pero só poido falar por min, non sei que pensan os demais.

«É moi diferente a cando baixei co Celta, en Burela levo moitos anos (...) Síntome querido»

«Non pensábamos en chegar a esta situación, o equipo era case idéntico ao do ano pasado»

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

«Non penso retirarme sen devolver ao Pescados Rubén-Burela a Primeira»