«O lema dun dos nosos deseños é "Agora xa foi, Marica don't cry"»

Yolanda García Ramos
YOLANDA GARCÍA VIVEIRO / LA VOZ

A MARIÑA

Veñen de abrir unha campaña de «crowdfunding» para botar a andar a empresa

27 feb 2017 . Actualizado a las 12:56 h.

Ana Corujo (Viveiro, 1993) e Lara Buyo (A Coruña, 1993) son as artífices de Lag, un proxecto que pensan abrir en Viveiro dentro de mes e medio aproximadamente. Trátase dunha tenda de produtos serigrafiados que elas mesmas, graduadas en Bellas Artes, deseñan e crean. Tan só a modo de anécdota, esta nova empresa e o reporteiro máis dicharareiro de Barrio Sésamo teñen moito máis que ver do que semella a simple vista: «Cando estabamos empezando a carreira e a traballar xuntas, buscando un nome artístico ocorríasenos, xuntando os nosos nomes de Lara y Ana, Larana Gustavo. Co paso do tempo démonos conta de que moi serio non era... pero dábanos pena sacar a Gustavo, por iso a letra G está como caendo no noso logo». Acaban de iniciar unha campaña de crowdfunding (ata o 2 de abril) para recibir doazóns e así Lag poida ver a luz en Viveiro.

-En que punto están agora?

-Xa nos mudamos para quedarnos en Viveiro. Imos abrir a tenda física en Navia Castrillón pero tamén imos ter tenda online, coa empresa que está preparando toda a programación para a web, para poder vender por Internet.

-Sen a Rede case non se existe...

-Viveiro é onde queremos vivir, un sitio tranquilo, pero aparte diso non é igual tan grande como para darnos de comer só cunha tenda física. Aínda así, ter unha tenda online é unha inversión que a longo prazo paga a pena.

-Xa lles demandaron produtos?

-Si, xa querían facer encargos.

-Este proxecto empresarial Lag gañou, e xa o contamos, un dos premios Incuvi Emprende 2016.

-Si, grazas ao cal recibimos unha oficina para empezar a traballar nel e un equipo de asesoramento que se chama Blu Business, co que seguimos en contacto.

-Acaban de abrir unha campaña de crowdfunding. Canto diñeiro buscan recadar coa iniciativa?

-3.500 euros. O crowdfunding está ben. É unha forma de adiantar os cartos pero que a xente leve recompensas. Non son doazóns completamente gratuítas. Pódense aportar dende 20 ata 500 euros. A campaña dura 40 días e nos 3 primeiros [ata onte] xa temos 930 euros. Non está nada mal. ¡Estamos moi contentas!

-Que produtos venderán?

-Pódense ver na nosa páxina de Facebook (https://www.facebook.com/Somoslag) ou na plataforma de crowdfunding, en verkami.com. Temos bolsos, tazas e camisetas de momento, pero pensamos tamén facer bolígrafos e roupa para nenos e bebés e, cun contacto en Viveiro, chaveiros e cousas de metal e madeira.

-En Verkami preséntanse coa finalidade de ‘dar un xiro á actitude social, cara a unha actitude máis optimista deseñando para rir en compañía’. Con simpatía...