«Levamos días recibindo a moita xente con proxectos e en busca de información»

Veciños, empresas e asociacións teñen aberto o prazo para solicitar axudas do Leader para crear negocios ou servizos


viveiro / la voz

Mañá, en O Valadouro (Casa da Cultura, 20 horas), comezan na Mariña as charlas informativas para dar a coñecer as axudas do programa Leader 2014-2020. Tralas reunións das mesas sectoriais nas que se expuxeron ideas para fomentar o desenvolvemento da comarca, a xerente da asociación Terras de Miranda que xestiona o Grupo de Desenvolvemento Rural, Elena Martínez, ofrece asesoramento. O GDR ten a súa sede na Casa da Cultura de Mondoñedo e nons vindeiros días pasará as súa oficina ao Centro Comarcal. Desde alí asesorará a asociacións, empresas e vecinos de catorce concellos mariñáns.

-¿Que repercusión terá na comarca esta nova edición dun programa con fondos europeos?

-Terá gran repercusión no territorio. A estratexia de desenvolvemento para a nosa zona saiu da reunión das mesas sectoriais (do sector forestal, agrario, público, turístico, social...). Sairon ideas, necesidades de territorio e potencialidades, e definiuse a estatexia de desenvolvemento. Creo que, xunto coas liñas de actuación que permite Agader, haberá subvencións para o sector agrario, forestal, para diversificar actividades no medio rural, para prestación de servizos... conseguiremos que haxa un desenvolvemento integral do territorio. Afecta a todo o territorio á hora de pór en marcha novas iniciativas e de crear e consolidar empregos.

-¿Que explicarán nas charlas que darán por toda a comarca?

-Explicaremos cales os obxectivos da estratexia. O primeiro é fomentar as sinerxias entre o turismo e o resto dos sectores do territorio. Aí entran actividades tanto de valorización de produtos e de recursos agrarios, como o fomento da actividade turística... Tamén se persegue mellorar a calidade de vida da poboación, potenciando a creación de máis servizos, tamén de servizos orientados a colectivos máis desfavorecidos, programas de atención infantil que faciliten a conciliación laboral e familiar... Outro obxectivo é impulsar o recoñecemento e o aproveitamento do patrimonio cultural e ambiental e fomentar a cooperación entre empresarios locais para buscar solucións comúns. Falaremos nas reunións dos proxectos que se poden presentar, de quen pode ser beneficiario do proxecto, dos trámites, dos prazos...

-¿E que prazos teñen os veciños, asociacións ou empresas para presentar as solicitudes?

-O prazo de axudas abreuse o pasado 30 de xaneiro e estará aberto ata o 31 de marzo. Iso na primeira convocatoria. De quedar cartos nesa primeira convocatoria abriríase unha segunda, ata o 31 de maio. Levamos días recibindo a moita xente que chega con proxectos e en busca de información. Uns proxectos son máis inmediatos e outros, para pór en marcha a partir do ano que vén.

«Esta anualidade contamos con 563.337,58 euros para repartir axudas»

-¿E para que tipo de proxecto van buscando información á súa oficina?

-Moitos parten de cero, non tiñan moito coñecemento do programa e non presentaran proxectos con anterioridade, veñen informarse por primeira vez. Tamén acoden asociacións sin ánimo de lucro para prestación de servizos a persoas con discapacidade, moita xente do ámbito do sector turístico, veu xente con ideas para aplicar no sector agrario para empleo de enerxías revovables ou como segunda actividade ou complementaria á principal, empresas que queren axudas para modernizarse e outras para nova creación...

-O GDR manexará tres millóns de euros para inxectar na Mariña en proxectos produtivos e non produtivos, ¿cantos fondos teñen este ano para subvencionar proxectos?

-Esta anualidade contamos con 563.337,58 euros para repartir axudas e para o 2018, xa saiu unha convocatoria parcial de 278.567,66. Sae a parcial para que nesta anualidade podamos comprometer proxectos bianuais.

-¿Xa rexistraron algún proxecto?

-De momento non hai proxectos presentados. A diferencia doutras convocatorias, este ano vai por concorrencia competitiva, por iso non é tan importante que se presenten antes ou despois os proxectos senón que esas solicitudes para subvención vaian ben traballadas.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

«Levamos días recibindo a moita xente con proxectos e en busca de información»