«Son 15 horas para ir tocar a Suíza, pero fanse amenas»

Alma Latina, de Viveiro, amenizará este sábado unha festa do Centro Galego de Basilea


Alma Latina volta a Suíza como xa fixera o año pasado, sendo daquela a súa segunda saída internacional, para amenizar unha festa do Centro Galego de Basilea. Os seus compoñentes Alberto Viamonte, Sandra García, Suso Barral, Javi Sanjurjo, Aaron Cazás e Jacobo Salgado fan con gusto a viaxe de ida e volta en furgoneta.

-Como fora o ano pasado?

-A experiencia moi boa. Nun dos momentos tocamos co grupo de gaitas do Centro Galego de Basilea unha peza xuntos. Daquela fora Foxtrot de Susana Seivane e este ano vai ser o Pasodobre romántico dos Cempés.

-Levan repertorio especial?

-Non. É unha festa máis coma as de aquí. Chámanlle a Festa da Queimada, con comida, danza, sorteos...

-Preparados para a viaxe?

-Xa estamos acostumados. Son 15 horas para ir tocar a Suíza pero fanse amenas. En canto colles a autovía en Barreiros xa é todo autovía ata aló. Ademais, coa furgoneta podes ir a 140 dende que entras en Francia.

-O GPS levouvos ben?

-Si, levounos ben.

-Coa de orquestras que hai en Galicia, contactaron coa vosa...

-Bueno, aló teñen ido máis orquestras. No caso noso viron que tiñamos certo repertorio en galego e con gaita. Imaxino que dixeron ‘¡mira saíron en Luar!’ e, xa sabes, se saes en Luar... (ri). A verdade é que a experiencia foi moi grata, portáronse moi ben con nós e sentímonos coma na casa. Foi unha sensación agradable. Xa son netos e fillos dos emigrantes os que a organizan.

-Por curiosidade, o ano pasado atopáronse con mariñáns que están aló emigrados?

-Se cho digo non o vas crer. Precisamente o que ensaia o grupo de gaitas díxome ‘¡ah eres de Cervo! Eu teño un piso en Cervo’.

-Quen conduce, por certo?

-Turnámonos... O ano pasado a ruta foi boa. Tamén nos coincidira o ‘veroño’ este e chegáramos a Suíza e facía tempo de primavera.

-Realmente compensa facer unha viaxe así de longo por só unha actuación?

-Este xoves saímos de madrugada, sobre as dúas ou as tres, para chegar o venres pola tarde. Imos actuar sábado á tarde-noite e o domingo a mediodía viremos xa de volta. O ano pasado non tivemos cansazo. Tamén é verdade que nas orquestras en xeral estamos acostumados a andar en coche. Pois si que compensa. O ano pasado compensounos porque queriamos vivir esta experiencia.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

«Son 15 horas para ir tocar a Suíza, pero fanse amenas»