«Agora traballo cos fillos dos primeiros xogadores que levei»

Os futbolistas e o Concello convencérono para que cumpra o seu 15.º ano seguido á fronte da canteira


VIVEIRO / LA VOZ

Francisco Vizoso Rojo (Viveiro, 1961) estivo a piques de deixar este verán a coordinación da base do Viveiro tras toda unha vida adicada ao fútbol.

-Por que quixo deixalo?

-Principalmente por motivos laborais. Sairame un traballo fóra de España. A presión dos xogadores e o moito apoio do Concello fixéronme repensar a decisión. E ademais tiven que someterme a unha operación que fixo inviable o traballo.

-E non lle faltou tempo para volver ao traballo. Uníronse á Escuela de Fútbol... e ao Praia de Covas?

-Está feito. Faltan moi pequenos flecos, pero teño o si de Emilio Rosanes.

-Que cambia con isto?

-Principalmente que todos defenderán ao Viveiro Club de Fútbol, pertencerán á mesma directiva e vestirán ca mesma camiseta, celeste. Serán 250 xogadores e entraremos no rango dun dos 25 clubs máis grandes de Galicia, co que iso supón en canto a apoios.

-Terán que aumentar o número de equipos...

-Si, por suposto. Non imos deixar un só neno sen xogar. Xa llo deixei claro aos pais na reunión da semana pasada: faranse os equipos que sexan necesarios para que todos xoguen.

-Levan dous anos asociados ao Deportivo. Os resultados son os esperados?

-Quédome con que cando un rapaz se lesiona, ao momento pode ir ao médico ou o fisio do Deportivo. Iso é máis importante que te inviten a ir a Riazor.

-No deportivo, veñen dun ano histórico, con tres equipos en Ligas Galegas.

-Por desgraza vai ser moi difícil que se volva repetir tras o descenso do infantil. Somos conscientes de que vimos dunha época moi boa, mandando xogadores para o Depor, o Celta... o lóxico é que agora veña unha época non tan boa.

-Buscarán talentos na comarca?

-Ningún club está disposto a axudar. Este ano só o fixo o Lourenzá. Deberíamos axudarnos máis, todos. Se fixésemos forza, nos unísemos, facendo tres equipos de toda a comarca, poderíamos telos a todos en Galega. Pero cada un tira para a súa casa. Agora venlle unha etapa boa ao Burela, subirán varios equipos a Galega, pero sen apoio dos clubs da zona é difícil que dure.

-Só Arturo foi tentado este ano polos grandes galegos?

-Non, el irá ao Depor, pero tamén vai estudar fóra. Chamaron a moitos outros e case todos priorizaron estar aquí. Chegaron ofertas do Ferrol, do Lugo...

-Leva 14 anos coordinando a canteira. Cantos traballando polo fútbol de Viveiro?

-Metido no fútbol de Viveiro levo uns 35 anos. Xa estou traballando cos fillos de moitos dos primeiros xogadores que levei.

-Algún xogador que o marcase?

-Dos recentes, especialmente Fede. Ese rapaz vai chegar moi lonxe, ten algo distinto. Xoga no filial do Porto e a Lopetegui namorouno.

-Cambiaron moito os nenos neste tempo?

-Cada vez lles gusta menos o fútbol. Antes un xuvenil daba o que fora por ir co Viveiro, agora case hai que obrigalos. Hai excepcións, como Arturo ou Álex Paz.

-E os pais?

-Todos pensan que teñen na casa a Maradona, pero a min respéctanme. Aquí non hai favoritismos, as regras son iguais para todos e as decisións tómanas os adestradores. Ata pensamos en facer os adestramentos a porta pechada, porque cando veñen os pais os nenos están máis atentos a eles que de pasalo ben co fútbol.

-Cambiaría algo na canteira do Viveiro?

-Non me gusta que paguen por estar aquí, pero non nos queda outra. Os pais deberan saber tamén que pagan por adestrar, por facer unha actividade; xogar xoga quen o merece.

-Hai seis anos que se separaron do primeiro equipo, como están as relacións?

-Teñen unha idea de fútbol que eu non comparto, traendo tanta xente de fóra. En calquera caso, a relación con Gundín é moi boa. Imos entendernos ben.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

«Agora traballo cos fillos dos primeiros xogadores que levei»