Nace un novo doce: a Rosca de Ribadeo

Elaborado con améndoa pola Confitería La Alianza, presentarase mañá no Parador


RIBADEO / LA VOZ

Medrou entre os fornos e os doces, na confitería La Alianza de Mondoñedo, pero recoñece que estes días non escasean os nervios: «Como non estamos acostumados a estes actos, pois un pouco nervioso e expectante si que estou... a ver como vai todo». O motivo é que mañá presentará un novo doce, a Rosca de Ribadeo. Será nun acto aberto ao público, no Parador de Turismo, a partir das sete e media da tarde. Onte, en Radio Voz A Mariña, no programa que se emite diariamente de 11.00 a 12.00 horas, Guillermo Redondas, que tamén esta ao fronte da confeitería La Alianza na rúa San Roque de Ribadeo, falou de como xurdiu esta idea: «Nós vimos de Mondoñedo, onde facemos a tarta de Mondoñedo. Aquí, preguntando aos amigos, vimos que non había un doce propio que levara o nome de Ribadeo, e ocorréuseme facer un sinxelo, que se puidera elaborar na casa, e doado de vender».

-Supoño que ao 100 % non nos pode avanzar cómo se fai... pero quizais os ingredientes.

-Por suposto. A Rosca de Ribadeo leva améndoas, eu acostumo a botarlle metade marcano a metade comuna, azucre, ovos, un pouco de auga e raiadura de limón e laranxa. É un postre que non ten moito segredo, doado de facer, pero que ten que levar un punto de cocido como é debido. Ao mesmo tempo, o que fixemos foi unha caixa moi elaborada na que se presenta, que reproduce un debuxo a plumilla que fixo Juan Monteavaro, que mo cedeu, o que lle agradezo moito. Na imaxe vai a Torre dos Moreno, o concello e tamén unha foto da catedral de Mondoñedo, porque son de Mondoñedo. A caixa é moi bonita. É tamén un argumento de venta.

-¿E As Catedrais?

-Evidentemente un produto de este tipo sempre vai enfocado tamén ao turista, para que se leve un recordo da visita con un doce que tamén pode regalar aos amigos. A praia das Catedrais vai máis en pequeno, en un lateral da caixa. Non podía faltar, pero penso que a Torre dos Moreno é tamén moi representativa de Ribadeo.

-¿E de que falamos? ¿De unha rosca dura, de un biscoito para mollar?

-Non é biscoito e tampouco é dura. É un doce similar a unha tarta de améndoa, dura por fóra e por dentro branda. Unha das cuestións da cocedura é que quede un pouco tostada por fóra e branda por dentro, para atoparlle unha diversidade de sabores, para que sendo o mesmo doce non saiba igual por dentro que por fóra. Ten similitudes co roscón de Vilalba... a améndoa, pero é unha rosca que a maiores leva laranxa.

-A confitería La Alianza, un negocio que é un referente en Mondoñedo, dende fai un tempo tamén está en Ribadeo. ¿Que tal vai a cousa?

-En Ribadeo estamos na rúa San Roque, onde estaba Eijo. De feito moitos clientes, sobre todo xente maior, se refiren a nós como Eijo. O certo é que as similitudes entre a confeitería La Alianza e Eijo son evidentes, pola artesanía e a tradición. Chegamos a Ribadeo e como calquera que chega custa un pouco entrar, pero imos pouco a pouco. Producimos coa mesma calidade que en Mondoñedo e é cuestión de tempo.

-¿E qué lle iría ben á rosca?

-Pois calquera licor doce... ou café. É apropiada para merendar ou de postre, máis que para o almorzo. Un Pedro Ximénez, por exemplo, iríalle estupendamente, ou un café, sen mais... iso seguro.

Mañá, degustación gratuíta dese e doutros produtos

Mañá ás 19.30 horas, no Parador de Turismo, celebrase o acto de presentación pública do novo doce. Será aberto ao público e comezará no salón San Roque, coas intervencións do fundador da confeitería La Alianza, Pablo Redondas Losada, e de Guillermo Redondas. Tamén se presentarán as caixas. A continuación, na cafetería do Parador haberá unha degustación gratuíta da rosca e de outros produtos de La Alianza.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
6 votos
Comentarios

Nace un novo doce: a Rosca de Ribadeo