Mondoñedo en Polonia


Estes días ándolle dando voltas á vinculación de Mondoñedo co cine, en boa medida porque o 31 de agosto cumpriranse 20 anos do pasamento do enxeñeiro industrial mindoniense Victoriano López García.

Victoriano foi un dos principais axentes renovadores do cine español. Profesor de Berlanga, Saura, Bardem e outros destacados profesionais do mundo do celuloide, recibiu o Goya de Honra en 1990 en recoñecemento ás súas achegas ao longo de toda unha vida ao sétimo arte.

Son moitas as relacións mindonienses co audiovisual: decoradores, actores, extras, localizacións e a rodaxe ou gravación de películas e/ou series como Flor de Santidad (Adolfo Marsillach, 1973), Del Miño al Bidasoa (José Briz Méndez-TVE, 1990), Novo de Parmuide (Roberto Vidal Bolaño-CTV, 1987) ou Terra de Miranda (Álex Sampayo, Carlos Sedes, Jorge Coira, Chema Gagino, José Jamardo, Emilio McGregor-TVG, Voz Audiovisual, Zopilote).

Terra de Miranda está de actualidade porque unha asociación de televisións rexionais polacas (algo parecido á Forta de aquí) comprou os dereitos de emisión dos trece capítulos da primeira temporada e incluso a súa emisión internacional (vía satélite) en polaco, algo que favorecerá que os polacófonos se familiaricen coa paisaxe mindoniense.

As relacións de mindonienses e polacos nunca foron malas e estreitáronse a finais dos oitenta. En agosto de 1989 o Papa Xoan Paulo II peregrinou a Compostela. Arredor dun cento de compatriotas de Karol Wojtyla desprazáronse a Santiago. Un dos vellos autobuses nos que viaxaban avariou á altura de Mondoñedo. Como houbo que pedir as pezas ao leste europeo e tardaron días en chegar, polacos e mindonienses conviviron uns días nos que o intercambio de destilados acadou gran protagonismo porque os polacos traían un vodka de altísima gradación (96º). Para eles a augardente galega era coma auga.

Vai ti saber se cando se inicie a emisión de Terra de Miranda en Polonia, algún dos peregrinos accidentados recoñece na pantalla do seu televisor algunha das localizacións mindonienses que aparecen con frecuencia na serie.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos

Mondoñedo en Polonia