Cartelería O rótulo antigo resístese a caer

O rescate documental dos vellos rótulos comerciais da provincia de Pontevedra é o inicio dun proxecto realizado por un grupo de profesores da Facultade de Ciencias Sociais e da Comunicación da Universidade de Vigo, dirixido polo profesor de Fotografía Jorge Lens Leiva. O traballo bautizado como Tipografía Rexional, é outra forma de recuperación da memoria histórica, pero fixando a atención en elementos da vida cotiá, en obxectos que aínda están aí e que sen darnos conta desaparecen aos poucos, carteis e tipos de letra que pertencen a outra época pero permanecen aínda que estean condenados a ser substituídos pola uniformidade que proporciona a tecnoloxía informática.

Xunto ao profesor Lens, Alberto Dafonte, Carlos Soutelo, Jesús Pérez Seoane, Paulino Pérez, Xaime Fandiño e Fortunato Rodríguez repartíronse as zonas e cada un fotografou aqueles rótulos que considerou interesantes para o proxecto dentro da zona asignada. A maior parte dos rótulos son de establecementos comerciais, pero tamén os hai de varias factorías, como Barreiras, ou conserveiras como Alfageme, e ata congregaciones relixiosas.

O proxecto, que está subvencionado pola Universidade de Vigo a través da cátedra Filgueira Valverde, non terminará nun departamento universitario onde ninguén poida consultalo. Ao contrario, está ao alcance dun click a través de Internet. Todas as fotografías recompiladas ata agora cólganse na páxina http://www.flickr.com/photos/tipografiaregional.

Deseño

Como explica Lens, ademais das referencias á memoria e os recordos, o proxecto tamén é un estudo sobre o deseño e a tipografía utilizada no século pasado. E é que ademais do patrimonio cultural tradicional e monumental e dos documentos gráficos (manuscritos, fotografías, carteis, etc) que son popularmente aceptados como pezas que atesouran boa parte da identidade dos pobos ?e xa que logo son de obrigada conservación por parte das institucións? hai outros de raíz popular que están aínda por recoñecer: «Constitúen un capital cultural etnográfico e social de primeira orde, son parte da nosa identidade e achegan trazos distintivos nesta época de uniformización cultural que coñecemos como globalización», asegura o profesor.