Vigo As salinas romanas máis antigas de Galicia abriranse ao público en xaneiro

A dous metros da porta do centro de saúde de Rosalía de Castro e a 6,60 metros baixo terra, atópanse as salinas romanas de evaporación solar máis antigas das achadas ata o momento en Galicia. O xacemento saíu á luz durante as obras de construción do centro médico, en 1998. Tras confirmarse a súa relevancia continuáronse os traballos arqueolóxicos que foron pondo de manifesto a importancia dos restos así como o seu bo estado de conservación.

Dez anos despois do descubrimento, a actual conselleira de Cultura, Ánxela Bugallo, acudiu onte a ver os resultados do proxecto de musealización recentemente finalizado, un flamante novo enclave para os amantes da historia que en menos dun mes poderá ser visitado polo público.

Bugallo visitou o Centro Arqueolóxico de Areal, en Vigo, bautizado cono Salinae, acompañada polo director xeral de Patrimonio Cultural, Felipe Arias, e por Pablo Carrera, director do Museo do Mar, xa que será este centro o encargado de xestionar a salina romana datada entre os séculos I e III, unha musealización na que o departamento realizou un investimento moi custoso que alcanza os 1.400.000 euros.

Bugallo destacou a aposta do seu departamento pola recuperación dun xacemento urbano situado en pleno centro da cidade e agradeceu a colaboración da Consellería de Sanidade para facelo realidade.

A superficie do xacemento ocupa 300 metros cadrados e ten unhas dimensións de 28 metros de ancho e 11 de alto. Un dos reclamos con maior encanto deste centro de interpretación é talvez o seu acceso a través dun ascensor de cristal -e tamén por medio dunha escaleira- que mergulla ao espectador na historia levándoo ata unha profundidade subterránea, a case sete metros baixo o nivel do chan.

O recinto está distribuído en tres niveis e no espazo, dividido en varias cubetas, pódense distinguir as distintas partes dunha salina: os depósitos, cavidades profundas onde se acumulaba a auga do mar; as zonas de evaporación, de menor altura para que a auga puidese quentarse; e as parcelas destinadas á cristalización do sal. Alí instaláronse unhas bancadas nas que os visitantes poderán atender con comodidade ás explicacións didácticas que se ofrecerán nas visitas guiadas, complemento á información que se ofrece en recreacións virtuais en vídeo e textos colocados á beira de vitrinas que conteñen pezas atopadas polos arqueólogos. A empresa madrileña Ingeniaqed S.A. foi a encargada de realizar a musealización deste xacemento e o proxecto arquitectónico foi realizado polo arquitecto Gabriel Santos-Zas.

Por agora, gratis

O director xeral de Patrimonio Cultural asegurou que o Centro Arqueolóxico de Areal abrirá as súas portas ao público no prazo máximo dun mes e por agora será de entrada gratuíta «aínda que pode revisarse». Na porta de entrada xa figura o seu horario: martes a sábados de 10 a 14 e de 16 a 20 horas, e os domingos de 10 a 14 horas.

Esta salina, xunto con outros restos da época aparecidos nas inmediacións, como ronseis funerarios e aras romanas, así como outros xacementos xa consolidados, como o de Toralla, confirman a importancia de Vigo como asentamento romano. Bugallo indicou que este xacemento musealizado complementarase en breve co que se situará no solar da rúa Marqués de Valladares, onde se descubriron os restos dunha factoría de salgadura.