Gondomar O anterior goberno de Gondomar ocultou a nulidade do PXOM

O anterior goberno municipal de Gondomar ocultou aos técnicos municipais a finais do 2005 que o Plan Xeral do 97 perdera toda a súa validez xurídica para poder seguir contando cos seus informes favorables e non paralizar a concesión de licenzas.

Un auto xudicial do TSXG do 21 de novembro daquel ano e notificado ao Concello o día 30 anulou o pleno do mes de maio no que os rexedores locais introduciron unha serie de correciones ao documento para non cumprir a sentenza firme que lles obrigaba a suspendelo definitvamente.

Inexplicablemente aquela resolución xudicial non entrou polo rexistro do Concello e non chegou a mans da secretaria municipal ata dous meses despois. Así o fixo constar nunha providencia escrita a man sobre o auto antes de incorporalo ao expediente o 16 de xaneiro de 2006.

O goberno municipal non cambiou a súa política urbanística por mor daquel auto xudicial.

Tres meses despois de que o PXOM desaparecese do ordenamento xurídico, en febreiro de 2006, o rexedor gondomareño requiriu aos técnicos municipais que seguisen informando as licenzas sobre a base do Plan Xeral do 97.

Foi entón cando a técnico de administración do Concello, Elena Ares Salgado, decidiu revisar o expediente do Plan Xeral e descubriu o citado auto xudicial que o anulaba.

Desde entón, negouse a informar favorablemente sobre a concesión de licenzas, segundo relatou onte na súa intervención como testemuña na segunda xornada do xuízo que se segue contra o anterior alcalde do PP e os cinco membros da súa xunta de goberno, acusados pola Fiscalía dun presunto delito de prevaricación urbanística.

Onte tamén interveu como testemuña Ana Begoña Merino, que exerceu como secretaria municipal en Gondomar ata o mes de outubro de 2005. Foi quen realizou un informe favorable para poder corrixir o Plan Xeral do 97 tras a sentenza firme de anulación.

A funcionaria explicou que realizou dito informe tras unha análise profunda da sentenza e tras consultar a opinión doutros expertos, polo que non se desdice de nada do que puxo no documento.

Aquel acordo plenario motivou que a Xunta de Galicia presentase un contencioso administrativo.

O TSXG ditou o auto do 21 de novembro de 2005 polo que acordou suspendelo. Devandito auto foi confirmado o 22 de decembro de 2005 , cando se resolve un recurso de súplica interposto polo Concello.

A Fiscalía solicita un ano e medio de prisión para os acusados, que non terán que cumprir no caso de quedar condenados, así como a inhabilitación por espazo de dez anos para poder ser elixidos membros da corporación.