«VICUS» E ABRAZOS A lupa xudicial volve fixarse no ladrillo do Val Miñor

Díxoo precisamente en Vigo a ministra de Administracións Públicas, Elena Salgado: «Ollo coa crise, que pode facer rexurdir os pelotazos urbanísticos e a corrupción». E o fiscal xefe de Galicia, Carlos Varela, non fixo máis que recoller a luva. Tres de cada catro actuacións xudiciais relacionadas co urbanismo en Galicia prodúcense na provincia de Pontevedra, segundo acaba de pór de manifesto coa súa memoria anual. O xefe autonómico do ministerio público apunta ata dun xeito concreto ás recualificacións como o principal xerador de delitos á sombra do ladrillo nas obras da provincia, polo que toda modificación pasou a contar co cualificativo de presunta sospeitosa.

Os beneficios que os cambios sobrevindos adoitan deparar nas citadas recualificacións ou modificacións da achaiadura cando se está redactando, están de feito motivando gran parte das investigacións urbanísticas que están a levar a cabo a policía xudicial e o Seprona na provincia.

A última en engrosar a lista ten ao Val Miñor de novo no punto de mira. Pero se primeiro foi Nigrán e despois seguiulle Gondomar, agora a quenda do seguimento exhaustivo é para Baiona. Todos os planos, documentos e expedientes que forman o avance do plan están a ser analizados ata o máis mínimo detalle para comprobar se sufriron algunha alteración ou cambios polo camiño desde que foi aprobado. Algúns concidadáns da vila mariñeira manteñen que hai cousas e ámbitos que mutaron. Por iso, a fiscalía púxose ao choio para ver se é ou non certo e quen pode facer os cambios, se é que se produciron.

Mentres, en Gondomar, o ex alcalde Carlos Silva e cinco dos seus concelleiros no pasado mandato enfrontaranse desde mañá a 18 meses de cárcere por cometer presuntamente un delito de prevaricación ao conceder licenzas de construción á conta dun plan xeral suspendido pola Xustiza. O actual alcalde, o nacionalista Antonio Araúxo, advirte en todo caso de que o «plan corrupto», como el lle chama, ten vida propia grazas aos intentos de reactivalo por parte do PSOE e o PP.

E mentres as investigacións proseguen e esténdense, o xuízo polo caso desatado hai case dous anos tamén en Gondomar aínda non ve a luz, nin de lonxe. Os xuristas implicados na defensa dos acusados auguran penas baixas, e ata algunha absolución por falta de probas. As autoinculpacións da noite das detencións e tamén da entrega do diñeiro, apúntanse ao froito da presión e o nerviosismo, o mesmo que Elena Salgado confesou sufrir cando advertiu dos efectos perversos da crise, curiosamente os mesmos que cando o ladrillo cabalga a lombos da bonanza económica.