Área metropolitana. O Val Miñor Nigrán e Gondomar presentan hoxe as súas alternativas ao plan Vigo Íntegra

O plan viario Vigo Íntegra que se presenta desde a Administración como a actuación perfecta para Vigo e os municipios do seu ao redor está a suscitar diversas opinións, na maioría dos casos enfrontadas ás propostas do plan.

Por unha banda, os veciños de Gondomar e Nigrán asociáronse en plataformas para loitar pola retirada do plan. E por outro, os alcaldes están a executar as súas propias accións desde o goberno para dar a coñecer a súa opinión. Así, esta tarde os rexedores de Nigrán e Gondomar, cada un pola súa conta, trasladaranse a Santiago de Compostela para reunirse coa Conselleira de Política Territorial, José María Caride.

Antonio Araúxo, alcalde de Gondomar, oponse ás dúas actuacións que o Vigo Íntegra reserva para o municipio que son unha circunvalación que comunicará a actual saída da autoestrada co centro e unha vía de alta capacidade entre Gondomar e Tomiño, que enlazará coa vía de alta capacidade Tui-A Guarda. De maneira que no encontro coa conselleira comunicaralle a súa opinión do plan, solicitando a súa retirada e propondo alternativas que si considera beneficiosas para Gondomar e os seus veciños, como son a eliminación da peaxe da autoestrada e melloras no transporte público. «As propostas do Vigo Íntegra en Gondomar non carrexarán melloras, ata todo o contrario. Se en lugar diso mellorasen o transporte público, gañariamos máis. ir de Vigo a Gondomar en bus ou viceversa é unha aventura», comenta o alcalde, Antonio Araúxo.

Mentres tanto, o alcalde de Nigrán, Efrén Juanes, que acudirá á súa cita acompañado do concelleiro de Urbanismo, Juan González e o de Medio Ambiente, Juan Hermida, pretende trasladar a súa conformidade co plan en xeral pero presentando o seu desacordo con algúns aspectos, para os que teñen alternativas. «Iremos para falar dos aspectos que afectan a Nigrán e que poden mellorarse, para conseguir que os veciños se mostren satisfeitos co plan, que sen dúbida, mellorará a seguridade viaria e a calidade de vida», comenta o concelleiro de urbanismo. Mostrarán o seu rexeitamento ao viario entre Balsa, Saiáns e Porto do Molle. «Consideramos que fracturará o territorio de Nigrán e non mellorará o tráfico», di Juan González. Tampouco consideran acertada a reordenación que levará a cabo na rotonda de Ramallosa, que converterá a rúa Manuel Lemos en dirección única cara a Vigo, a Francisco Lago única cara a Praia América e Torrente Ballester única cara a Ramallosa. Ademais, Efrén Juanes reunirase tamén coa delegada provincial, Isabel Domínguez, acompañados de representantes das asociacións veciñais.