O cómico presenta esta noite en Cambados o seu espectáculo «A.M.E.N. (Accións Misioneiras Evanxélicas Nocturnas)»
10 nov 2011 . Actualizado a las 06:00 h.Na súa particular cruzada nocturna contra o pecado, o Padre Merino, personaxe creado polo cómico Fran Campos, visita esta noite (23.00 horas) o pub Pilón de Cambados.
-O que fai vostede non é exactamente un monólogo, non si?
-Tecnicamente si, porque estou eu só en escea. Pero é certo que non é o típico monólogo que estamos acostumados a ver, por exemplo, en El club de la comedia. Eu mesturo as miñas historias con música en directo, xogos de maxia e, sobre todo, con moita participación do público. Eles son o cincuenta por cento do meu espectáculo.
-Cando e como naceu Padre Merino?
-Xurdeu hai cinco anos dun exercicio de improvisación nun obradoiro de teatro. Vin que o personaxe podía dar xogo e montei un espectáculo para el.
-Como lle deu por sair a «evanxelizar» pola noite?
-Padre Merino deuse conta de que, nestes tempos, para chegar á xente hai que ir onde estan eles. Así que vai aos pubs e as tabernas para falarlles, sobre todo, dos pecados capitais.
-Cal é o que máis lle ocupa?
-A luxuria, por suposto. E el sabe do que fala porque antes de ser cura tivo aventuras carnais.
-Ten tido algún problema coa igrexa por conta deste personaxe?
-Un par deles, sin importancia. Pero non só coa igrexa. Tampouco é fácil que Padre Merino saia en televisión.
-Pero os cómicos han de ser irreverentes...
-Deberían selo, xa que coa excusa do humor podemos falar das cousas importantes.
FRAN CAMPOS (PADRE MERINO) MONOLOGUISTA