Rivero voa a Ámsterdam para a olimpíada internacional
16 jul 2011 . Actualizado a las 06:00 h.Óscar Rivero está viaxando hoxe a Ámsterdam para participar na 52.ª Olimpíada Matemática Internacional. Aos seus 16 anos, é o único galego do equipo español. Vive en Xinzo, fala inglés e francés, ten varios premios literarios e toca o piano. Cun expediente envexable, ten unha curiosidade inxente e non se lle sobe á cabeza.
-¿Como van ser estes días?
-Mañá teremos a cerimonia inaugural. As probas serán o luns e o martes. O resto da semana, un programa cultural. As probas, en dúas sesións de catro horas e media nas que teremos que facer tres problemas bastante complicados. A competición é individual. O normal, dos seis problemas, sería facer como moito tres.
-¿Son unhas matemáticas especiais?
-Parten dos contidos do bacharelato, pero ás veces para a resolución usan técnicas fóra do alcance dos institutos. Estes problemas son distintos dos de clase. E participar nunha olimpíada non é só ser dos mellores de clase, senón razoar e estar acostumado a facer cousas distintas.
-¿Como foi o entrenamento?
-Tivémolo en Barcelona do 20 ao 30 de xuño, oito horas ao día.
-Iso esgota a calquera.
-Lévase ben, é agradable polo ambiente e disfrútase moito.
-¿Que tal está esta asignatura nos institutos?
-Entendo perfectamente que pode ser moi aburrido como están pensados os currículos no ensino secundario.
-¿Cambiaría algo?
-Pois en vez de realizar tantos exercicios mecánicos, facer exercicios máis de razoar, de pensar e que non sexa só memorizar e aplicar unha fórmula. É inútil aprender un algoritmo e facer vinte exercicios iguais. Eu penso que habería que potenciar máis o razoamento.
-¿Que son as matemáticas para vostede?
-Unha paixón que me reporta moita satisfacción cando consegues resolver un problema. Facelos potencia a capacidade de pensar noutras áreas.
-¿En que rama se atopa mellor?
-Na álxebra, porque a xeometría non se me dá tan ben.
-Nun ano irá á Universidade.
-Quero facer matemáticas e física en Barcelona.
-¿Que pensa da crise actual?
-A política gústame. Participo nun debate en Macedonia. Irei en novembro coa fundación San Patricio, sobre o modelo de Parlamento Europeo. E sobre a situación actual gastáronse moitos cartos en cousas non importantes, tampouco sabería moi ben as causas, pero o capitalismo salvaxe non levou a nada bo.
-¿Que relación ve entre a música e as matemáticas?
-A música é moito máis creativa e as matemáticas tamén, mais son distintas. Poden ter certa relación, pero as segundas son máis de usar a nosa parte máis racional e a música apela máis ao lado emocional.