MARCOS VENCe ruibal «Centros de seis países colaboramos en 7 linguas»

Seis estudantes do IES San Clemente, María José Suárez, Francisco Alonso, María Teresa Balo, Daniel Bonilla, David García-Santamarina e Alberto Rey, xuntamente co profesor Marcos Vence, participaron nun proxecto didáctico que conseguiu premios en convocatorias de España, Grecia e a UE. Foi «unha experiencia moi enriquecedora», afirma este docente.

?¿Como foi ese proxecto de colaboración transnacional?

?Foi un traballo na eTwinning, unha rede que apoian o Ministerio de Educación e outras institucións, activa en 27 países europeos e que busca a colaboración entre centros de diversos países. Ten máis de 120.000 docentes rexistrados e eu interveño nela desde o ano 2005.

?¿E en que consistiu o traballo?

?No curso pasado colaboramos o noso centro e outros de Nájera, Grecia, Francia, Turquía e Romanía. Elaboramos conxuntamente unha historia, que en galego titulamos Pek, a pulga viaxeira, e foi interesante como centros de seis países colaboramos en sete linguas: a autóctona de cada quen e máis o inglés.

?¿En que consistiu a participación do San Clemente?

?O alumnado do noso centro pertence ao ciclo medio de Sistemas Microinformáticos e Redes, e éramos o único de formación profesional. A historia relata experiencias da pulga Pek na visita aos seis países, e en cada un foi elaborada polo propio centro, que facían a versión na súa lingua e en inglés. O noso alumnado coloreou a banda deseñada, coa ferramenta GIMP, que utilizamos nas aulas. Tamén aquí se imprimiu unha revista. Ter unha mostra impresa do traballo que se tiña realizado na Internet con ferramentas informáticas foi do máis valorado polo noso alumnado.

?¿Tiveron algunha axuda?

?Si, da Concellaría de Cultura de Santiago. Iso permitiu que dous alunos ofrecesen un obradoiro de GIMP e banda deseñada no centro sociocultural do Castiñeiriño. Agora o Concello de Vilagarcía tamén ofrece colaboración, e na próxima edición participará un centro desa cidade de Arousa.

?¿Que foi o máis importante para o centro e para o alumnado?

?Para o alumnado serviu para que aplicase na práctica a realidade das ensinanzas do ciclo, e tamén culturalmente porque se traballou a identidade europea, con diferentes linguas, e viron usos moi interesantes das tecnoloxías da información. Para o centro, conseguiu o selo de calidade europeo de Twinning e, alén dos premios, o traballo foi escollido como «proxecto do mes» en España. Agora estamos na segunda edición, con 20 centros, deses mesmos países e máis de Portugal, Italia, Polonia, Bélxica, e experimentalmente tamén Nicaragua.