Preparan dous poemarios inéditos do barcalés Ardeiro coincidindo co seu segundo cabodano

Onte cúmprironse dous anos do pasamento do poeta barcalés Xosé Manuel López Gómez, máis coñecido por Ardeiro, cuxa pegada humana segue estando moi presente entre os seus veciños e amigos da comarca de Barcala. Algúns deles, e acompañados polos seus fillos, lembrarano hoxe cun sinxelo acto a través dunha xuntanza na parrillada Val de Barcala, en Seoane, onde o poeta acostumaba manter conversas cos seus achegados.

Daránse cita, entre outros, o seu bo amigo, tamén natural da parroquia de Logrosa, ao igual ca Ardeiro, o catedrático e profesor da Uned José Antonio Ponte Far, quen leva tempo traballando na edición de dous libros de poemas inéditos que o poeta deixou escritos e que se espera vexan a luz nos primeiros meses do 2010.

José Antonio Ponte Far puxo estes dous poemarios inéditos en mans de Miguel Anxo Fernán Vello, admirador da obra poética de Ardeiro, polo que a través da editorial Espiral Maior traballaron coa idea de presentalos por estas datas con motivo do segundo aniversario. Non puido ser, e agora esperan facelo nos vindeiros meses.

O catedrático José Antonio Ponte Far avanza que se trata de dous poemarios de moito nivel e de primeira liña, polo que publicaranse os dous fundidos nun mesmo libro. O primeiro deles é o titulado Un tempo de amor, que consta de 43 poemas longos, cunha media de vinte versos cada un. «É un libro extraordinariamente atractivo, escrito no último ano da súa vida, cando non tiña destinataria afectiva, pero que demostra todo ese sentimento de afectividade do amor que tiña Ardeiro», salienta Ponte Far.

O segundo poemario titúlase Voces na diáspora, cunha carga emotiva moi forte sobre «o desarraigo, a nostalxia, as ansias de volver á terra que os viu nacer e que teñen os emigrantes galegos en Cuba que coñeceu Ardeiro, sobre todo na última etapa da súa vida» segundo confesa Ponte Far.