Propoñen crear un Consorcio para a Normalización Lingüística

A primeira sesión dos IX Encontros para a Normalización Lingüística, organizados polo Consello da Cultura Galega (CCG) fixo onte balance da política lingüística desenvolvida nos últimos catro anos desde a Xunta. O CCG salientou «a transversalidade das accións, a posta en marcha das galescolas e o decreto sobre uso do galego non ensino» reclamando a revisión e mellora do diálogo político, social e institucional e a creación dun Consorcio para a Normalización Lingüística.

Os Encontros, aos que asisten máis de cen expertos e técnicos dos servizos de normalización, foron inaugurados por Ramón Villares, presidente do Consello, e Henrique Monteagudo, secretario da institución e director do Centro de Documentación Sociolingüística de Galicia, encargado da organización. Non acudiu ningún representante da Secretaría Xeral de Política Lingüística.

O balance, presentado por Nel Vidal Barral, da Comisión Técnica do Centro de documentación Sociolingüística de Galicia, propón a creación dun Consorcio para Planificación Lingüística, xa suxerido hai dez anos neste foro, «coa finalidade de integrar os esforzos das distintas administracións» e subliña a necesidade de dedicar un 0,3 por cento do presuposto da Xunta a este cometido. Para os autores precísanse «mais planificación, mais recursos e mais participación».

O estudo documenta o descenso constante da partida orzamentaria desde o ano 2005, de xeito que nese ano o orzamento supoñía un 0,22 por cento do presuposto xeral da Xunta, baixando o porcentaxe en 2009 ao 0,17 por cento. O presuposto para Política Lingüística diminuíu un 8,9 por cento.

Polo que se refire a outras propostas para a vindeira lexislatura, o informe suxire asemade «unha política lingüística planificada con obxectivos claros desde o conxunto do Goberno» e máis recursos, «ata un 0,3 por cento do presuposto xeral da Xunta e unha utilización mais eficaz».