Óscar Ponte, informático, 35 años ¿Por qué na actualidade se está contratando tanta asistencia técnica na Xunta de Galicia cando é moito máis barato para as arcas públicas contratar funcionarios?

Alberto Núñez Feijoo: «A clave é organizar mellor»

«O bipartito disparou nun 62% os gastos en consultorías, a pesar de que dispón de 10.000 funcionarios máis que hai catro anos. A clave é organizar mellor o seu traballo seguindo criterios de racionalidade xa que a Administración autonómica conta con profesionais moi cualificados que poden asumir gran parte das tarefas que foron externalizadas. A miña intención é efectuar unha profunda reorganización administrativa para suprimir burocracia innecesaria e xestionar con resposta inmediata aos procedementos».

Emilio Pérez Touriño: «Fanse cando non hai medios»

«A Administración autonómica contrata asistencias técnicas ou calquera outro tipo de prestacións nas condicións máis eficientes que se poidan realizar de acordo cos procedementos legais vixentes. E isto faino cando carece de suficientes medios propios para levar a cabo as mesmas prestacións que ten que contratar.

»De acordo coa lexislación vixente, tanto a insuficiencia de medios existente como a necesidade do gasto para poder realizar a contratación do servizo deben quedar acreditadas no expediente».

Anxo quintana: «Regularizamos traballadores»

«A contratación de asistencias técnicas era unha práctica habitual da etapa do PP. Na actual Xunta reservamos esta fórmula só para os supostos previstos na lexislación e para tarefas non desempeñadas por funcionarios.

»Nesta lexislatura regularizamos a centos de traballadores contratados por esta vía na época anterior. O BNG dende o Goberno apostou por un acceso á Administración pública con procesos baseados na publicidade, igualdade, mérito e capacidade, desbotando a opacidade e o clientelismo».