a pie de calle «Os produtos gourmet teñen bastante saída, sobre todo para regalos»

Alicia Fontenla Mosteiro (Meis, 1981) abriu hai sete meses O pente de ouro, unha tenda de alimentación e artesanía galegas na rúa Real de Caldas de Reis. Aínda que di que as vendas non son de momento para botar cohetes, sostén que moita crise non hai. Con sol o movemento de xente é maior e agarda unha boa tempada de verán.

-¿Por que O pente de ouro?

-Tiñamos claro que o nome tiña que facer referencia a algo de aquí. Tras barallar varias opcións pensamos no tesouro de Caldas. Pedimos permiso ao Museo de Pontevedra, donde está depositado, e tamén chamamos á Mesa pola Normalización Lingüística, porque nos gustaba máis a forma pente que peite. Nos dixeron que as dúas eran válidas. A xente pregunta polo nome e a mandamos ao Auditorio de Caldas, donde hai unha réplica.

-¿Que ten máis saída, a alimentación ou a artesanía?

-Non che podería dicir. Un pouco de todo. A prata e o acibeche gustan moito. Os produtos gourmet tamén teñen bastante saída, sobre todo para regalos, aínda que tamén facemos cestas. Todo o que temos na tenda é feito en Galicia, o único de fóra son unhas bruxas de Valencia.

-¿O máis raro en alimentación?

-Quizais as algas, hainas ao natural para ensaladas e deshidratadas. Tamén o gourmet de marisco, como centolo en lata ou percebe. Hai membrillos con noces e paté de pemento. Tamén temos moitas larpeiradas.