Sarreaus estrea o maior campo de «paintball» da provincia de Ourense

Dous centenares de veciños de Sarreaus, Xinzo e Verín achegáronse onte ata a pequena parroquia de Freixo-Feande para gozar da festa de apertura do campo de paintball creado pola empresa ourensá Rural+ nunha superficie de 25.000 metros cadrados dos seus montes comunais.

A inauguración, á que acudiron tamén representantes municipais de Sarreaus e Xinzo, ofreceu a oportunidade de gozar dunha demostración deste xogo deportivo no que se emulan combates cunhas armas especiais que disparan proxectís de pintura que, tal e como recordaban onte os promotores da iniciativa «son completamente biodegradables, xa que están fabricados con colorante alimenticio», explicaba Andrés Castaño.

O xogo, que ten cada vez máis adeptos en todo o mundo e úsase tamén como terapia de equipo para grupos de traballo de empresas, ofrece distintas modalidades, e por iso dividíronse os 18.000 metros cadrados en tres seccións distintas dependendo do tipo de xogo que se queira desenvolver. O resto da superficie destinarase a outras actividades tanto de ámbito deportivo -tiro con arco, ou prácticas de golf- como educativas do medio rural.

«Segundo os nosos cálculos a clientela potencial debería de chegar tanto da cidade como de Xinzo, Verín, que son as localidades máis próximas, aínda que estamos moi preto da autovía e nunca se pode saber como evolucionará finalmente o negocio, porque a oferta agora mesmo é non só a maior da provincia, senón das de Galicia», recordaba Andrés Castaño.

Á cita acudiron tamén os propietarios da firma que recuperou para o turismo rural e de natureza a próxima aldea de Couso. «Estamos a apenas 400 metros e ambas as instalacións poden complementarse perfectamente», apuntaban os promotores do campo.