A masa da que estamos feitos, ¿é toda parida polo mecanismo de Higgs? Non. Vexámolo: vostede está composto por átomos, formados á súa vez por protóns, neutróns e electróns. De cada quilo do seu corpo, case medio quilo é de protóns e o outro medio de neutróns (os electróns pesan 2.000 veces menos ca eles e apenas se notan na báscula).
Os protóns e neutróns están formados, á súa vez, por tres pezas máis pequenas chamadas quarks, que adquiren a súa masa a través do famoso bosón de Higgs. Ata aquí todo ben, pero hai un gran problema por resolver: se sumámo-la masa desas tres pezas fillas de Higgs o resultado é... ¡só o 1% da masa de protóns e neutróns! É dicir, de cada quilo do seu corpo, só 10 gramos son de quarks; ¡só 10 gramos son culpa de Higgs!
Bota algo en falta? Fáltanos explica-la orixe do 99% restante! Einstein resólvelle o problema: descubriu que a enerxía se pode converter en masa e viceversa; polo tanto os 990 gramos restantes son froito da condensación da enorme enerxía que mantén a eses quarks unidos.
No seu corpo pesa máis Einstein ca Higgs. Somos enerxía condensada; que bonito, ¿non?