Policíaco

M. Anxo Fernández

OPINIÓN

08 jul 2011 . Actualizado a las 06:00 h.

C ando comezaba a armar a miña obra Lume de cobiza alá polo 2006, cumpríame traer de Los Ángeles ao experto funerario e necrófilo Sugar Jones, que anos atrás intentara roubar a Marilyn Monroe do seu nicho no Westwood Village Memorial Park en Un nicho para Marilyn. É un prea que ao tempo vén a ser o alter ego do propio Frank Soutelo, e ocorréuseme que podería vir a roubar o... Códice Calixtino. Faríao para unha organización especializada no tráfico de obxectos culturais singulares, e trocalo por unha valiosa arxila mesopotámica relativa ao culto dos mortos. Pero considerei que o lector rexeitaría a proposta ¡por inverosímil! O modus operandi foi moi semellante ao que onte se soubo: o ateo Sugar infíltrase como turista na praza do Obradoiro para visitar a catedral e localizar onde gardan o libro que finalmente desaparecerá. Non queda moi claro que fose o autor do roubo, pero Soutelo vaino considerar así para chantaxealo. Por medo a un escándalo, o Cabildo pasa de acudir á policía e recorre a unha axencia de detectives. Por desgraza, o libro nunca aparecerá... Como Lume de cobiza está a ser un pequeno (e feliz) acontecemento no zurrado panorama das nosas letras, a xornada de onte foi taquicárdica para quen lles escribe porque desde primeira hora comezaron a entrar chamadas, SMS e mensaxes no feisbú, de amigos sorprendidos pola coincidencia.