escrito en cafeterías : Reciclaxe

Contáronmo ou soñeino. Durante as manifestación do pasado Cumio do Clima de Copenhague, a policía danesa cargaba contra os ecoloxistas con paus feitos de madeira de bosques sostibles. Os gases lacrimóxenos facían afogar aos manifestantes, pero o certo é que estaban homologados para contaminar o menos posible. Os axentes, en fin, calzaban botas de coiro sintético no que figuraba un selo que garantía que non se matara animal ningún para fabricalo. Despois de todo, Dinamarca é Dinamarca e, aínda que Shakespeare faga dicir a Hamlet que alí «algo cheira a podre», poucos países hai no mundo que se preocupen máis de que o medio ambiente estea limpo.

Perante estes policías había persoas chegadas de todas partes do mundo para protestaren polo quentamento global e outras cousas. Uns leábanse a patadas coas cristaleiras dos McDonalds para así amosar o seu desgusto coas multinacionais, se ben o pé que daba as patadas calzaba uns Nike feitos na China. Outros incendiaban unha barricada con gasolina comprada a Exxon Mobil, o que facía que unha nube de CO2 sobrevoase permanentemente a manifestación como unha tormenta, ou como un deses símbolos do malhumor que aparecen nos tebeos. Moitos tomaron fotos de todo isto cos seus teléfonos móbiles de última xeración e colgáronas en Facebook e Google, onde apareceron orladas da publicidade automática dunha empresa de recollida de residuos nucleares.

A batalla campal durou tres días. Feridos, detidos, desfeitas? Mais cando todo acabou pasaron por alí os servizos de limpeza municipal. Uns empregados vestidos con uniformes de astronautas separaron o cristal roto e as balas de plástico da policía, xuntaron o metal dos coches calcinados co dos botes de fume, os zapatos desaparellados e os restos orgánicos e inorgánicos, e metérono todo en contedores perfectamente etiquetados para levalos en camións ás fábricas dispersas polo rural danés, pero tan ben disimuladas que son inapreciables a simple vista.

Xa empezaron a saír algúns destes materiais tratados por medio dun proceso de reciclaxe. Do plástico das botellas de auga mineral abandonadas polos manifestantes fixéronse algúns escudos novos para os antidisturbios, e das balas de goma elaboráronse solas de zapato deportivo que comprarán os futuros manifestantes. O mundo é así: unha empresa de reciclaxe global sometida á lei da conservación da enerxía no que nada, nin as cousas nin as ideas, nin se crean nin se destrúen senón que unicamente se transforman.