: Manuel Abelleira Acabar co sistema capitalista

ende os medios de comunicación capitalistas estase informando interesadamente sobre os disturbios que ocorren en Grecia. En realidade, non reflexan máis que unha parte do descontento da xuventude e os traballadores gregos. Descontento que se expresa normalmente a través de folgas xerais coma a do pasado 10 de decembro, a décima dos catro anos de goberno de dereitas presidido por Karamanlis. O seu último ataque é contra o sistema de pensións.

Lonxe da destrución da propiedade e dos saqueos que levan centrado a atención dos medios de comunicación da burguesía, o movemento da clase obreira e da xuventude grega está amosando a súa seriedade e masividade. A determinación da clase obreira grega deixouse sentir en todo o país, paralizando toda a actividade económica e con manifestacións masivas nas principais cidades.

A destrución non é o método de loita adecuado. Ao contrario, son utilizados para desprestixiar o movemento e tratar de illalo, evitando a simpatía e solidariedade activa de traballadores e xóvenes dentro e fóra das fronteiras gregas. O propio movemento estudantil ten denunciado estes métodos e aos grupos de gamberros, lumpens e provocadores policiais infiltrados.

Dende o Sindicato de Estudantes solidarizámonos coa loita dos xóvenes e traballadores gregos contra o asasinato de Alexandros Grigoropoulos e contra o Goberno. O aparello do Estado en Grecia é herdanza directa da ditadura que sufriu este país entre 1967 e 1974. Coma no Estado español, tampouco foi purgado nin se eliminaron os elementos fascistas que había no seu interior. Non é de estrañar que, ante un movemento de masas, a policía grega actúe coa máis brutal represión. Este feito recorda ao asasinato a mans da policía, esta vez italiana, de Carlo Giuliani no 2001, durante as protestas contra a globalización capitalista.

No Estado español, a crise comeza a golpear duramente e as loitas serán inevitables. O noso sindicato xa leva convocadas dúas folgas xerais este trimestre, nas que participaron decenas de miles de xóvenes en defensa dun ensino público e contra Boloña (cuxo obxectivo é expulsar aos fillos dos obreiros do ensino universitario, con medidas como a substitución das becas por créditos e a creación de másteres públicos de 2.500 euros) e co lema ¡A crise que a paguen os capitalistas! A crise estase profundizando en todo o planeta e os grandes capitalistas esixen que cos impostos de todos se salven os seus negocios. Pero ¿quen salva aos traballadores?