soleira : Empresarios fóra de órbita

Non vou entrar, porque non paga a pena, no contido do manifesto da directiva -non dos socios- do Club Financeiro Vigo. Calquera que teña uso de razón (nos meus tempos presumíase aos oito anos) pode decatarse sen esforzo de que menten ou caen na vulgaridade.

O grave non é o contido senón a dimisión que os asinantes fan das súas competencias, experiencia e carácter. Por exemplo, nunca vin que os empresarios de Vigo se manifestasen contra as monstruosidades urbanísticas da cidade, sen dúbida porque non lles resultaría moi práctico facelo.

E materia hai abondo, e cada día anovada, dende ese centro comercial mastodóntico e antiestético que pecha, da maneira máis decisiva posible, a cidade ao mar ata o edificio mesmo da sede do CFV -todo un síntoma. A calidade de vida dos seus veciños non é merecente da menor atención dos manifestantes.

Nin barbaridades como o Verbum, nin tampouco o novo auditorio que se proxecta sobre un solar que foi dunha empresa que fracasou, como tantas outras da cidade. Nin que case ningunha empresa viguesa teña chegado á terceira xeración.

Galicia pode ofrecer ao mundo máis dunha ducia de grandes escritores entre os mellores de calquera cultura; pero non pode ofrecer nin un só empresario que estea a ese nivel. Tampouco isto, que demostra un moi grave retraso, entra nas preocupacións de certos empresarios. Pero si a política lingüística. Estraño mundo o mundo no que algúns viven.