escena Fasero: «Quizais o modelo destes 25 anos non era o bo»

O sector escénico galego considera que a Agadic abandonou as obrigas do seu papel e ten ao colectivo contra as cordas pola redución das axudas e polos retrasos nos pagos das mesmas. Fasero admite que hai recortes e retrasos, pero rexeita que non haxa esforzo por parte da Administración.

-¿Hai recortes no sector escénico e retrasos nos pagos?

-Son evidentes os recortes e responden a unha situación que todos coñecemos e que non podemos esquivar. En canto aos retrasos nos pagos, o habitual sería pagar a noventa días e agora estamos pagando entre catro e cinco meses, dependendo dos casos.

-¿Cal é a natureza dese recorte de axudas?

-No mellor ano da historia, o 2007, a Agadic destinou ao teatro 2.850.000 euros. No peor, que é este, o presuposto son 2.250.000. Hai 600.000 euros de rebaixa, que é importante, pero é menor que noutros sectores culturais. Para o ano próximo, o presuposto é máis ou menos o mesmo que este. Non podemos falar de redución.

-O sector asegura que está sendo abandonado por Agadic.

-Repasando as cifras dos últimos cinco anos parece o contrario porque hai unha aposta moi forte polo sector. A inversión duplicouse e hai compañías que nese tempo recibiron arredor de 600.000 euros.

-Pero as compañías din que poden desaparecer.

-O que se lles pide é que aguanten un pouco máis do habitual e creo que as grandes poden. E, por outra banda, se non poden quizais deberían pensar que o modelo destes 25 anos que elas pediron non era o bo.

juan carlos fernández fasero director da axencia galega das industrias culturais (agadic)