Recén premiada na Semana Negra de Xixón, Dime algo sucio é, segundo Diego Ameixeiras, o referente máis próximo a Historias de Oregón, a novela que protagonizará durante o mes de agosto as páxinas literarias de La Voz.
-¿Déronlle ganas de cambiar algunhas cousas ao texto desde que gañou o premio?
-Non lle fixen cambios, aínda que si fixen unhas liñas de resumo para cada capítulo. Estou expectante pola sensación que me poida producir vela publicada no xornal porque, aínda que a escribín sabendo que era para un xornal, nunca sabes como pode quedar. Por outro lado, tamén quero ver como é a relación cos lectores a través do periódico.
-¿Que relación cre que van ter os lectores coa historia?
-Espero que vexan unha novela negra, criminal. Tamén espero que se enganchen todos os días, que vaian collendo as distintas tramas que hai para eses temas que trato: incendios, maltrato, prostitución. Que entendan tamén que, aínda que son temas de actualidade, o que fago con eles é ficcionalos.
-Para os lectores doutros libros seus, ¿a cal se aproxima máis?
-É unha novela que ten moito que ver con Dime algo sucio. En certo modo podería entenderse como unha continuación, cuns tipos de personaxes semellantes, ao límite, algo marxinais. Vidas cruzadas, tramas paralelas... E tamén polo ton: frases curtas para contar máis con menos.
-«Dime algo sucio» foi recoñecida na Semana Negra.
-A novela entrou a última hora e creo que gustou. O que dixo Paco Ignacio Taibo dela é que era innovadora, e que había nos autores novos de novela de xénero un pesimismo moito máis marcado que nos autores de xeracións anteriores.