Explosión, abordaxe ou golpe de mar

Pedro de Llano explica que, naquela altura, algunhas das teorías que manexou Bas Jan Ader explicaban que a seguridade «dos barcos non era proporcional ao seu tamaño e que barcos moi pequenos podían navegar ben polo Atlántico».

As causas da desaparición do artista nas augas do Atlántico non se coñecen, aínda que se especula con tres. No informe de Capitanía sinálanse restos dunha pequena explosión. Outra posibilidade é que o Ocean Wave fose abordado por unha embarcación moito máis grande que non advertise a súa presenza. A terceira hipótese é un golpe de mar. De Llano sinala que Ader «era un home precavido e contaba cunha liña de vida».

Primeira mostra

A exposición é a primeira que se realiza na Península sobre a obra deste artista nacido en Holanda (1942), residente en Estados Unidos, e fillo dun home represaliado polos nazis por colaborar na fuxida de fuxidos holandeses. Un pai que foi dende Holanda a Oriente Medio en bicicleta.

Na mostra están recollidas as partes documentais norteamericanas e galegas, con testemuñas dos galeristas do artista en distintas partes do mundo e tamén coa achega dos mariñeiros que faenaban no Eduardo Pondal aquel día en que apareceu o Ocean Wave. A outra parte da mostra son as pezas de Bas Jan Ader, un percorrido selectivo por unha parte fundamental da súa obra performática. Entre elas, a reprodución física desa mostra en Los Ángeles, que foi o punto de partida para unha viaxe que, aínda que fose como mito, rematou na Coruña.