Nomeamento O portugués Miguel von Haffe é o novo director do CGAC

O portugués Miguel von Haffe Pérez (O Porto, 1967) foi nomeado hoxe novo director do Centro Galego de Arte Contemporáneo (CGAC) polo padroado desta institución, unha decisión tomada «por unanimidade» e con «total transparencia e obxectividade», segundo conselleiro de Cultura.

Roberto Varela recordou que a elección do novo director do CGAC, que ocupará este cargo durante cinco anos, é o resultado dun concurso de carácter internacional avaliado por un comité de expertos, presidido polo director do Museo Nacional Centro de Arte Reina Sofía, Manuel Borja-Villel.

O conselleiro asegurou que von Haffe, licenciado en Historia, na especialidade de Arte, e cunha ampla traxectoria no ámbito artístico, «coñece moi ben a realidade artística de Galicia, Portugal e España», indicou Varela.

Así mesmo, o responsable de Cultura do Executivo galego anunciou que o CGAC afrontará unha nova etapa, na que experimentará cambios orientados a crear un novo estatuto xurídico para que o centro «teña unha maior autonomía e, sobre todo, unha personalidade xurídica propia», indicou.

Roberto Varela asegurou que se buscará un «modelo propio» para o CGAC, «ben a través dun organismo autónomo administrativo ou dunha fundación», de maneira que poida «gozar das vantaxes destes estatutos, que permiten unha maior flexibilidade, autonomía e a posibilidade de recibir doazóns ou patrocinios de entidades externas».

Puntualizou que se trata dunha «necesidade imperioso» para que o CGAC «poida modernizarse e traballar con certa flexibilidade», xa que, co modelo actual «non está permitido» que o centro reciba doazóns ou patrocinios, porque forma parte da estrutura orgánica da Consellería de Cultura.

No entanto, sinalou que tratará este asunto con von Haffe, que se trasladará a vivir a Galicia a próxima semana, aínda que indicou que «case todos os grandes museos son organismos autónomos» e que tamén o comité de expertos recomenda modificar os estatutos xurídicos do CGAC.

Varela afirmou que as súas «preocupacións» respecto ao CGAC son lograr que sexa un «centro de arte de referencia, situado nun enclave privilexiado, desde unha perspectiva atlántica, e non só europea», así como «integralo na sociedade galega» e «atraer ao público» para recuperar «o alto número de visitas».

Así mesmo, afirmou que, «nun futuro, o CGAC traballará en conxunción coa Cidade da Cultura» e formará parte dunha «rede de museos de Galicia».

Sobre o proxecto presentado polo novo director do centro no concurso, Varela sinalou que non o coñece en profundidade, pero que aposta por «converter o CGAC nun espazo museístico máis que de produción artística», así como por «aproveitar que está en Santiago de Compostela e volver ao seu valor de museo».

Agregou que a próxima semana von Haffe, ao que «non considera» estranxeiro, «porque O Porto forma parte do ámbito cultural galego», empezará a estudar a programación do museo para os próximos dous anos, que será de «altísima calidade».