17 de maio A obra de Novoneyra protagonizará o Día das Letras Galegas do 2010

A Real Academia Galega quixo conmemorar o décimo aniversario da morte de Uxío Novoneyra (Parada do Courel, 1930-Santiago, 1999) convocando á súa obra para que sexa a protagonista do Día das Letras Galegas do ano vindeiro.

Os adxectivos manexados pola Academia arredor desta designación falan de «entrega total», obra en «continua forxa» e mais dun poeta «cunha gran preocupación pola comunicación co pobo».

A Real Academia Galega considera que é un poeta ideal para a celebración do vindeiro ano das Letras Galegas e quizais por iso a institución esperou só a que se cumprisen os dez anos dende o seu pasamento, que a tradición da celebración ten como norma.

Hai dous elementos que a institución que preside Xosé Ramón Barreiro sinala como fundamentais á hora de explicar a súa elección para o ano próximo. O presidente sintetiza o parecer do plenario da Academia sinalando que Novoneyra foi «un home moi comprometido co idioma e co país», ao tempo que tivo «unha moi forte e referencial presenza na cultural galega». Noutro sentido, explicou o presidente da Academia que a poesía de Novoneyra foi a un tempo «novidosa e popular, foi renovadora». Segundo a Academia, a obra do autor de Os Eidos estivo «en continua forxa. Mais non por isto foi un poeta de minorías».

Tamén sinala a institución que algúns dos seus poemas longos como Vietnam Canto «estiveron presentes en cancións e recitacións desde a súa creación en 1968», subliñando a intención do poeta de participar nos movementos do seu tempo.

Para Francisco Fernández Rei, tamén académico, «hai moitas dimensións da obra de Novoneyra que merecen este recoñecemento, pero tamén está esa maneira da súa poesía tan pulida e ao mesmo tempo tan sonora e tan popular». Coinciden os académicos en que Novoneyra foi un poeta co favor do público e que esta circunstancia «pode dar moito xogo para as distintas actividades que se desenvolvan ao longo do ano».

Fernández Rei sinala que o homenaxeado no 2010 ten que ser «celebrado na rúa e ten unha obra coa que resulta fácil participar en calquera actividade, na rúa ou nos centros, nos recitais ou nos concertos».