Arquitectura O novo Goberno de Andorra suspende o proxecto de Gehry por «desmesurado»

O Goberno de Andorra decidiu suspender temporalmente o contrato asinado polo anterior Executivo co arquitecto norteamericano Frank Gehry para construír o futuro Museo da Paz e a Identidade e Arquivo Nacional do Principado, ante o seu custo «absolutamente desmesurado».

A decisión foi tomada no Consello de Ministros do pasado martes, día 23, e a suspensión é efectiva desde o xoves, segundo informou o xefe do Goberno andorrano, Jaume Bartumeu.

O Goberno deuse un prazo de tres meses para analizar o contrato detidamente e decidir se o rescinde ou non de xeito definitivo.

En todo caso, Bartumeu afirmou que se trata dun contrato que el non asinase.

Trinta millóns de euros

No entanto, o xefe do Goberno andorrano quixo deixar claro que Andorra contará cun novo arquivo, pero non necesariamente polo custo «absolutamente desmesurado» que supón o previsto por Gehry, que supera os 30 millóns de euros.

Entre os motivos que provocaron esta decisión, segundo explicou Bartumeu, están as recomendacións realizadas polo Consello Internacional de Arquivos, que asegurou que é necesario evitar os emprazamentos «perigosos», como sería o caso.

En segundo lugar, ao Goberno actual cónstalle que a «calidade mecánica» e os «riscos geotécnicos» do terreo elixido polo anterior Goberno para construír o edificio «non parecen garantir as necesidades mínimas de conservación e preservación que todo equipamento de arquivo debe ter».

Tamén se considerou o custo que terá a adecuación do terreo, que podería superar os 2,5 millóns de euros, segundo os primeiras cálculos. A ese diñeiro débenselle sumar os case 2,3 millóns de euros que o anterior Goberno xa gastou no proxecto, cuxo deseño foi dado a coñecer publicamente a finais do pasado mes de maio.

Un aspecto que aínda está no aire é saber quen quedará coa propiedade do deseño do edificio, que segue o ronsel doutros anteriores concibidos por Gehry, como o Guggenheim de Bilbao ou o Hotel Marqués de Riscal, da localidade riojanoalavesa de Elciego.