Carlos Álvarez: «Acepto pagos en bitcoins porque é o futuro e evito as comisións»
OCIO@
Turismo vip polo Camiño Francés é a orixinal proposta que Carlos Álvarez ofrece dende a súa pequena axencia de viaxes, Turigrino. El é ademais taxista en Quiroga e ocúpase de ir buscar aos seus clientes, xeralmente a Madrid, pasealos polo Courel durante oito días e devolvelos a Barajas. O incrible é que na serra galega, no máis recóndito curruncho do mundo, páganlle con bitcoins, a moeda de Internet, que el acepta sen problemas porque daquela a converte en euros e, ademais, evita «as comisións dos bancos».
-¿Como traballa co bitcoin?
-En realidade, para min é unha forma de pago, como a tarxeta ou o PayPal, que tamén levo no taxi, porque o bitcoin é unha moeda virtual, ti non a ves. E o que fago cando a xente paga con ela é convertela de inmediato, recibila xa en euros.
-¿Que gaña entón co bitcoin?
-Acepto pagos en bitcoins porque é o futuro e porque evito as comisións dos bancos. A diferenza coas tarxetas é que os mil euros que ingreso son completos, non se queda un 2 ou un 3 % polo camiño. E é un servizo máis.
-Teño catro ou cinco, o que pasa é que non os ves fisicamente. Esta moeda funciona en Internet, onde tes asociada unha conta ao teu ordenador, cun moedeiro dixital.
-¿E que se ve nese moedeiro?
-Se ve o número. Antes era un número 4 se tiñas eses bitcoins, pero engadíronlle tres ceros para fraccionar a unidade, porque o 1 de decembro valía 1.163 dólares, e ¡cómo vas pagar un café con iso! Agora, no moedeiro dixital aparece o número 4.000, e van ter que lle poñer máis ceros aínda para partir outro pouco o bitcoin.
-¿Non lle interesa quedar con máis cantidade?
-Non, non. Nos últimos seis meses o prezo oscilou [consulta o seu ordenador] entre 1.163 e 85 dólares. É moi arriscado de momento, porque podes perder diñeiro, aínda que tamén ganalo. Eu comprara os meus a 60 dólares. Podería cambialos xa, pero non me interesa. ¿Para que?
-¿Onde mercara os seus?
-Podes collelos en calquera plataforma de negocios de bitcoin en Internet. O servizo da miña páxina o tiña con Mt.Gox, a que se acaba de caer, pero agora estou con BitPay.
-¿E hai moito turista que lle ofrece esta forma de pago?
-Polo momento, non moito, a verdade, pero algúns si que me din, por exemplo, que me pagan os primeiros trescentos euros da reserva da viaxe en bitcoins. E sen problema. Pero polo de agora non existe un tráfico demasiado estable.
-¿Que perfil de turista é o que ten no seu negocio?
-É un turista vip, de medio-alto ou alto poder adquisitivo. Xente que ven sen presa, a percorrer o Camiño ao seu ritmo, con tranquilidade. Eu vounos buscar, xeralmente a Madrid, e fago con eles o percorrido polo Courel, asistíndoos no que precisen.
-¿De onde veñen?
-Moitos, de Arxentina, México e Venezuela. Tamén de Dubái e Estados Unidos.
-¿Fillos de emigrantes?
-Algúns, pero non todos. Son grupos de seis ou sete persoas que veñen sen presa e queren todo ben feito. A partires de abril xa empezan a chegar, e así hasta novembro.