O Concello de Padrón aportará 3.000 euros para os traballos e para a dotación do mobiliario necesario
25 feb 2015 . Actualizado a las 13:13 h.Coincidindo co Día de Rosalía, que se conmemorou onte con motivo do 178 aniversario do nacemento da escritora, a fundación que leva o seu nome e o Concello de Padrón asinaron un convenio polo que este último aporta 3.000 euros para acondicionar e dotar de mobiliario unha sala, co fin de poder albergar en condicións axeitadas obras e fondos documentais relativos á vida e obra da poetisa, así como futuras doazóns.
Tralo acto de firma, celebrado nas oficinas anexas a Casa-Museo de A Matanza e no que estivo presente o presidente da Fundación Rosalía Anxo Angueira, o tesoureiro, Justo Cortizo, o alcalde de Padrón, Antonio Fernández, e a concelleira de Cultura Carmen Lois, Angueira sinalou que a institución está «moi satisfeita» co convenio xa que se facía «moi necesario» ter un espazo acondicionado para gardar o «legado histórico de Rosalía», así como para conservalo en boas condicións, ordenalo e arquivalo.
É que, ata o de agora, o patrimonio documental da Fundación Rosalía non estaba custodiado en condicións axeitadas polo que, grazas a achega do Concello de Padrón a través dunha subvención directa, a entidade poderá poñer en marcha un arquivo á altura do valor documental que atesoura a Casa-Museo de A Matanza, para que estea en boas condicións ao dispor dos investigadores. Logrados os fondos para acondicionar a sala e para o mobiliario, a fundación padronesa agarda conseguir financiamento para a ordenación e dixitalización do arquivo.
A sala que se acondicionará é a antiga vivenda da que fora guardesa da Casa-Museo, Maruxa Villanueva.
Renovación
Máis de 40 anos despois da súa apertura ao público, a Casa-Museo de Rosalía de Castro precisaba dunha renovación urxente da súa museoloxía, adaptándoa aos novos tempos e ás novas lecturas da escritora, así como incorporar á narrativa novas pezas.
Nese proxecto está inmersa a Fundación Rosalía, en base a un deseño de Xosé Barro aprobado polo plenario. A institución está buscando financiamento para completar o proxecto xa que lle queda pendente o primeiro andar da Casa-Museo e, así, poder concluír a desexada reforma. Semanas atrás foi a Deputación de A Coruña a que fixo unha achega a fundación, de arredor de 30.000 euros, neste caso para acondicionar a planta baixa do inmoble.
Coa firma do convenio, o Concello de Padrón sumouse aos actos do Día de Rosalía.
«Estamos satisfeitos co convenio porque é moi necesario ter un arquivo en condicións»
Anxo Angueira