Que a terra lle sexa leve, Avelino

As asociacións e concellos amosaron as súas condolecias polo pasamento do barcalés

Valoración Con: 1 estrella 2 estrellas 3 estrellas 4 estrellas 5 estrellas   votos ¡Gracias! Envíando datos... Espere, por favor.
Avelino Pousa Antelo na súa casa dos Verxeles, no municipio de Teo. xoán a. soler

óbito as despedidas do galeguista pousa antelo

O falecemento do galeguista Avelino Pousa Antelo conmocionou a Galicia debido á importancia da súa figura. As persoas e institución coas que tivo contacto ao longo da súa vida expresaban onte o seu pesar.

Teo

Pesar pola perda do seu fillo adoptivo. O Concello onde Pousa antelo residía dende o ano 1990, amosou o seu pesar polo pasamento do seu fillo adoptivo e transmitiu as condolencias a súa familia. O corpo de Avelino Pousa velarase no centro sociocultural da Ramallosa, no concello no que viviu durante 22 anos. O goberno local asegura que durante o tempo que viviu no municipio mantivo unha intensa actividade social, polo que recibiu o titulo de fillo adoptivo hai cinco anos. Para que os veciños e amigos poidan dicirlle o derradeiro adeus realizarase un acto cívico de despedida as 19 horas na Casa do Concello.

A Baña

Bandeiras a media asta na Baña. As bandeiras oficiais da Casa do Concello de A Baña, municipio onde naceu Avelino Pousa Antelo, máis coñecido no Val de Barcala coma Lucho do Peto, ondean a media asta e con crespóns negros, en sinal de loito polo seu pasamento. O alcalde bañés, Andrés García Cardeso, sinalou que esta mañá ten previsto achegarse ata Teo oara expresarlle persoalmente as condolencias á familia do ilustre galeguista barcalés, ademais de remitirlle un ramo de flores. García Cardeso gabou a súa figura «destacada dentro do galeguismo, e cun gran papel no cooperativismo dun medio rural como é o noso, polo que lamentamos fondamente a súa morte». O BNG bañés lamenta que un dos seus fillos máis ilustres nunca recibise unha homenaxe institucional por parte do concello onde naceu, algo din «triste e lamentable, que dá boa medida da catadura moral dos alcaldes que tivemos».

Negreira

Lembranza en Negreira. A asociación de veciños A Barcalesa, da súa parroquia natal de San Xoán de Barcala, tamén expresaron o seu pésame cun emotivo «querido Lucho, os teus veciños de Barcala sempre te lembraremos». O Concello de Negreira, co que Pousa Antelo tiña unha vinculación importante, xa que participou en moitos actos culturais -sobre todo promovidos no seu día pola desaparecida asociación cultural Afonso Eanes- tamén expresou o seu pésame polo pasamento do intelectual galeguista. Un monolito de pedra cunha placa no parque infantil a carón do colexio do Coto, lembra a súa forte pegada na comarca de Barcala.

Fundación Castelao

A Fundación Castelao recorda a súa traxectoria como presidente. A Fundación Castelao, da que Avelino Pousa era presidente, tamén quixo amosar o seu pesar polo pasamento: «Avelino foi alento desta casa dende o momento da súa fundación e lamentamos o seu falecemento». A fundación aproveitou a ocasión para facer un repaso pola traxectoria do galeguista como presidente que compilou a obra completa de Castelao nunha edición para a editorial Galaxia, celebrou o 50 aniversario do pasamento do mesmo cunha exposición da súa obra pictórica e completou a catalogación do seu traballo.

escritores en galego

Os escritores galegos din adeus a un dos «Bos e Xenerosos». A Asociación de Escritores en lingua galega, que distinguiu a Pousa Antelo co nombramento no 2004 de Bo e Xeneroso, expresou o seu desexo de que o intelectual sirva como exemplo pola súa «loita sen descanso pola mellora material, cultural e social da nosa terra e da nosa xente».

USC

O reitor destacou o seu labor no agro. O reitor da USC, Juan Casares, sumouse as numerosos mostras de condolencia destacando: «O labor realizado por Pousa Antelo en prol da formación dos traballadores do agro, así como a súa achega ao mundo da cultura e o galeguismo».

Asociación de xornalistas

Avelino Pousa como xornalista. A asociación de Xornalistas de Santiago uniuse ás condolencias e recordou a labor de Pousa antelo como xornalista, que colaborou dende os anos 30 en A Voz de Barcala e publicou centos de artigos en distintas publicacións galegas sobre temas agropecuarios.

Máis información na páxina 31 da sección Cultura