O conxunto celeste atópase en disposición de igualar esta semana a marca de 8 vitorias nos 8 primeiros partidos do Portonovo 2014/15
06 oct 2015 . Actualizado a las 05:00 h.Sete de sete. Coa súa remontada o pasado domingo ante o Alertanavia no Novo San Pedro (2-1 final), o Vilalonga de Antonio Fernández sitúase a tiro dun triunfo de igualar o espectacular pleno de oito partidos gañados nas oito primeiras xornadas de Liga da Preferente Sur polo Portonovo a pasada tempada. No seu intento por superalo, o conxunto celeste conta como aliado cun calendario propicio, a tenor dos rivais que se lle presentan por diante nas vindeiras dúas semanas.
Este domingo os de Antonio deberán visitar o campo do Porriño. Un conxunto que ocupa a decimoquinta praza na clasificación provisional. E se ben o vindeiro rival do Vilalonga ten mellorado as súas prestacións nas dúas últimas xornadas, nas que sumou 4 puntos, foi gañándolle 3-1 ao Caselas, antepenúltimo na táboa, e empatando o domingo en Sanxenxo 1-1. Na casa o Porriño gañou un partido, igualou outro, e caeu 0-2 co Cultural Areas, outro dos candidatos á pelexa polas dúas prazas de ascenso directo á Terceira.
A vindeira semana o Vilalonga contará co factor campo ao seu carón para medirse a un Valadares hoxe decimosegundo na clasificación logo de encadear tres derrotas. Será sete días antes do gran derbi que levará o cadro celeste ao Salvador Otero da Illa de Arousa.
A sétima xornada de Liga resultou case redonda para o Vilalonga, por canto ampliou de 5 a 7 puntos a súa vantaxe cos seus inmediatos perseguidores. Un Céltiga que continúa segundo tras empatar a 0 na Estrada, e o Arenteiro, que releva o Gondomar na terceira praza igualado a 14 puntos co cadro illense.