A asociación de escritores en lingua galega recoñeceu o traballo das mulleres de Beariz na difusión da literatura de tradición oral
28 may 2017 . Actualizado a las 05:00 h.Alsira Gil Ramos, Orosia Gil Ramos e Ólida Diz son Mestras da Memoria. A asociación de escritores en lingua galega (AELG) elixiu ás coñecidas como Pandereteiras da Alén para recibir este recoñecemento polo seu traballo a prol da difusión da literatura de tradición oral. As tres veciñas de Alén, na parroquia da Xirarga, no Concello de Beariz, foron homenaxeadas nun acto celebrado no centro cultural Vello Cárcere de Lugo.
Os premios Mestras e Mestres da Memoria, que chegan á súa quinta edición, concédense a informantes de literatura popular, por toda unha vida de dedicación exemplar á transmisión oral de saberes e valores da nosa cultura popular tradicional. A proposta da Sección de Literatura de Tradición Oral, coordinada por Antonio Reigosa, a asemblea xeral de Socios-as da AELG acordou outorgárllelos ás Pandeireteiras da Alén (Orosia e Alsira Gil Ramos e Ólida Diz Ramos) e a Serafín Mourelle Bugallo. «O principal valor dunha sociedade constitúeno as persoas, os tesouros humanos vivos, homes e mulleres que estiveron atentos para recibir dos seus predecesores a herdanza cultural, que logo reciclan e recrean, e que adaptan e actualizan con xenerosidade para, por fin, transmitir todos eses saberes herdados aos que veñen detrás», ensalzan desde a AELG. E engaden: «Nesta cadea de comunicación, a cultura popular mantense viva porque se actualiza sen renunciar ás esencias que a distinguen, que a fan ao tempo singular e universal».
Alsira Gil ten 96 anos, Orosia Gil ten 95 e Ólida Diz 90. «Por idade e, como consecuencia, por acumulación de experiencias e saberes, gardan a memoria deses esencias da nosa cultura», argumentan desde a asociación de escritores en lingua galega.
Aquí podes ver un dos vídeos coas homenaxeadas actuando: As Pandereiteiras do Alén tocan «Eran dos namorados».