O Programa Marco, en colaboración coa Deputación, foi presentado aos alcaldes dos concellos da provincia
14 oct 2014 . Actualizado a las 20:10 h.O Programa Marco da Xunta de Galicia destinara axudas por valor de 6 millóns de euros á provincia de Ourense para a mellora dos camiños de titularidade municipal. O programa, as condicións do mesmo, os requisitos para acceder ás axudas e as condicións que se requerirán na orde que se publicará no Diario Oficial de Galicia nuns días foron expostos na xuntanza que se celebrou no salón de actos da delegación da Xunta en Ourense. As axudas executaranse, segundo se informou na reunión, ao abeiro dun convenio de colaboración asinado no seu momento entre a Consellería de Medio Rural e a Deputación de Ourense. Na xuntanza cos alcaldes e representantes dos concellos da provincia participaron o delegado da Xunta, Rogelio Martínez, e o director xeral de Desenvolvemento Rural, Antonio Crespo. As axudas ascenden a 5.728.947 euros e os fondos distribuiranse en dúas anualidades (2,7 millóns serán presupostados para o presente ano e o resto, algo máis de 3 millóns, estarán a disposición no 2015). O obxectivo do Plan Marco é «mellorar as condicións de vida dos residentes nas áreas rurais, poñendo en valor as dotacións existentes de infraestruturas básicas, e levar a cabo actuacións dirixidas a fomentar a implantación e mellora dos servizos básicos demandados pola poboación rural». Con estas premisas promoveranse actuacións de ampliación, mellora e mantemento de camiños de titularidade municipal na provincia de Ourense.