En 1971 estreouse en Francia Mourir d’aimer (Morrer por amar ), protagonizada por Annie Girardot, que contaba a relación amorosa dunha profesora de Instituto cun dos seus alumnos. Baseábase nunha historia real e reflectía o brutal rexeitamento da sociedade, que acabou provocando o encarceramento da profesora e o seu suicidio.
En 1993, Brigitte Trogneux, que daba clase nun liceo de xesuítas de Amiens, casada e con tres fillos, iniciaba unha relación cun alumno, 24 anos máis novo. Divorciouse, foise a París e hai dez anos casou e segue casada co que se converteu no presidente máis novo da República Francesa.
A sociedade admite sen problemas que o home sexa vinte, trinta ou ata corenta anos máis vello que a súa parella, pero non que o sexa a muller. Hai un prexuízo que só se suaviza se a famosa é ela. Quizá se trata dunha relación de poder: a riqueza, a fama, o poder, borran a diferenza de idade. E penso en Edith Piaf e Theo Sarapo ou en Sharon Stone de 54 anos e o seu noivo de 27 anos.
Brigitte Trogneux foi durante algún tempo a parte máis poderosa da parella -a profe ante o alumno-, pero esa relación hai moitos anos que cambiou e haberá que entendela como a que uniu no século XIX a Benjamín Disraeli coa súa esposa Mary Anne, moito maior que el, e gran colaboradora no seu labor político. Haberá que pensar, sinxelamente, que hai historias de amor que, a pesar dos prexuízos, acaban ben.