Mala Z

Xose Carlos Caneiro
Xosé Carlos Caneiro DE BAR EN BAR

OPINIÓN

04 feb 2016 . Actualizado a las 05:00 h.

Hai expresións que en si mesmas son puñaladas. Que esas expresións sexan pronunciadas por un cargo público, por riba, fainas aínda máis repulsivas e tristes. Que o concelleiro de Moraña que onte dimitiu esperase cinco días para facelo, parece ofensivo. Que o tal concelleiro se encargase dos asuntos de Igualdade no seu concello, se o anterior non abondase, semella paradóxico e lacerante. Mala Z (non quero, por cortesía cos lectores, escribir completo o ominoso sintagma). Mala Z, escribiu o edil do PP no seu Facebook dirixíndose á socialista Carmela Silva. Onte dimitiu pedindo desculpas. Velaquí a frase que recollía a web de La Voz de Galicia: «Quero acompañar as miñas desculpas cun xesto que evidencia o meu arrepentimento polo erro cometido. Por iso, no día de hoxe presentei a miña renuncia voluntaria como concelleiro do PP en Moraña». Renuncia voluntaria, afirma. Pero a súa frase agacha dardos feroces, tan bruscos que un pregunta cómo é posible que a representatividade democrática acolla, tamén, a individuos como este. Mala Z. Ata onde chegou o ser humano, veño preguntando estas últimas semanas no recanto desta contraportada sentimental. Porque detrás de mala Z agáchase tamén o rancor, violencia, a profanación da pel de todas as mulleres que tiveron que ler ou escoitar tal expresión nos noticiarios, a barbarie e a furia, o desprezo por un igual, o asco, inquina e todas as palabras ásperas que ensucien esta columna. Detesto publicamente, e ben alto, a crueldade machista. Levanto a niña voz contra a degradación do nome de calquera muller nai nena moza dama. Disparo con palabras ás voces de saña e coacción e acoso e derribo. E grito liberdade e tenrura. Unha vez máis. Unha vez máis.