O Ministerio de Educación vai esixir a todos os profesores de España un certificado de antecedentes por delitos sexuais. Trátase dunha medida para protexer aos alumnos de posibles agresións, e nese sentido poderíanse incluír tamén os delitos de malos tratos. O malo é que, como non existe aínda un rexistro central de delincuentes sexuais, o que se vai a pedir é un certificado de delitos penais. Non parece que sexa unha medida apropiada para o que tenta evitar. Comisións Obreiras xa denunciou que pode «vulnerar a protección de datos».
A modificación operada pola lei 1/2015 converteu en delitos leves o que antes eran faltas e non entraban nos certificados. Por exemplo: faltar ao respecto e consideración debida á autoridade; abandono de animais; inxuria ou vexación inxusta de carácter leve a persoas; abandono de xiringas ou instrumentos perigosos; exercicio de actividades carecendo de seguro obrigatorio; desobediencia no cumprimento de obrigacións de convenio xudicial familiar; infracción no réxime de custodias de fillos menores...
En España os profesores réxense polo Estatuto do Empregado Público, que non esixe carecer de antecedentes penais, senón «non acharse inhabilitado por resolución xudicial». Que é o que vai aparecer agora nos certificados de penais esixidos? Quizais que lle tiraron unha pedra a un garda nunha manifestación fronte ao Congreso...