A noticia da detención de dous dirixentes da banda terrorista ETA é sen dúbida unha boa noticia, pero lanzar as campás ao voo e que o ministro do Interior diga que o que queda da banda cabe nun microbús, que desde a última detención vai sen condutor, non me parece prudente nin acertado. Creo que as campás hai que gardalas para o momento en que definitivamente ETA acepte disolverse sen condicións. Talvez iso non chegue a producirse nunca e, mentres haxa un só membro vivo que non estea no cárcere, a posibilidade da banda de facer dano segue aí. Felicitar ás forzas de seguridade que contribuíron a esta última e importante detención e dar publicidade a esa acción é o que debe facerse, porque o merecen e porque a sociedade española debe estar informada, pero desdeñar ao inimigo non parece unha boa táctica. Que sexan poucos e sen dirección non é ningunha garantía de que sexan inofensivos. Unha parte importante da sociedade vasca consideraba heroes aos membros da banda. Non nos esquezamos dos carteis que empapelaban as rúas de moitos barrios en Euskadi. Non creo que ese sentimento teña desaparecido por completo. E pode haber entre os etarras que agora caben nun microbús algún mozo disposto a demostrar que seguen sendo heroes. Así que mellor non provocalos.