O presidente Obama presentou ante o mundo a decisión do Tribunal Supremo dos Estados Unidos sobre o matrimonio homosexual como «un gran paso na nosa marcha cara á igualdade». O tribunal fallou que é un dereito nacional. No mesmo sentido manifestouse Hillary Clinton, que se declara «orgullosa de celebrar unha vitoria histórica para o matrimonio igualitario». A Igrexa, que eu saiba, de momento non comentou a noticia, pero a actitude do papa Francisco ante o tema da homosexualidade quedou patente na conversación cos xornalistas que viaxaban con el ao regresar a Roma tras a súa visita a Brasil. «Se unha persoa é gay, busca a Deus e ten boa vontade, quen son eu para xulgala?». E engadiu algo que moitos católicos parecen ignorar: «O catecismo da Igrexa católica explícao moi ben. Di que non deberían ser marxinados por iso, senón que deberían ser integrados na sociedade».
Integrarse na sociedade quere dicir, entre outras cousas, o que Obama anunciou nas redes sociais: «As parellas gais e lesbianas agora teñen o dereito a casarse como calquera outra».
Os cinco votos a favor e catro en contra do tribunal americano son un índice da división sobre este tema naquela sociedade e noutras que, como España, admitiron o matrimonio homosexual. Pero este é sen dúbida un gran paso contra a discriminación.