Na Coruña unha muller é xulgada por desatender ao seu fillo, a quen ten practicamente abandonado. Un veciño de Carballo é detido en Colombia por intentar sacar do país un bebé que súa nai vendeu. En realidade, por intentar realizar un soño que se mostrou imposible. O neno da Coruña vaga só ata altas horas da mañá polos parques da cidade. Cando sae do colexio, súa nai non o vai recoller, e é a policía a que día tras día se ocupa do neno. A parella de Carballo intentou por todos os medios médicos e legais ter un fillo. Doenzas da muller e dificultades burocráticas impediron que puideran lograr o que se converteu nunha obsesión: ser pais. A muller multada na Coruña deixou só na casa durante días ao seu fillo para irse de festa. A parella de Carballo marchou a Colombia ao recibir a chamada dunha muller que lles ofrecía a nena que parira pouco antes. Firmaron uns papeis, déronlle 18.000 euros e 1.200 máis a un médico que actuou de intermediario. A muller da Coruña foi xulgada e castigada cunha multa de 180 euros. E todo segue igual. O veciño de Carballo foi detido en Colombia e afronta unha pena de 30 a 60 anos de prisión por tráfico de nenos. Verdadeiramente o mundo está mal feito: Deus dá pan a quen non ten dentes.